viernes, enero 29, 2016

Las primeras froris

Poemus dizil con toa segurança que amus passau dela toñá ala primavera sin passal pol iviernu. Las pelonas rezias i los charcus encongelaus ni los amus vistu i me da que ni los vedremus al passu que vamus. Los almendrus afrorecin vergonçúus i ata las primeras froris se cain mentris que muchas yemas están sin salil. Los cielus tapaus dela última semana quitó de que s'abrieran con viciu. Sin embargu, velaí están. Tamién están las primeras froris delos frutalis i en muchas senaras se barrunta ya el abrieru, mentris que enos caminus i ena parti del Muru los gamonitus se abrin i cierran formi la lus del sol. Por si angunu á díu a vel el calandariu, estamus a últimus de eneru i assina está el campu:





.

domingo, enero 10, 2016

El pañuelu talaveranu

Los talaveranus Cristóbal Cansado González i Antonio Gómez Broncano acaban de sacal un reportagi mu buenu enllenu de retrataúras antiguas sobre el hatu talaveranu i los colocamientus del pañuelu: El pañuelo en la indumentaria tradicional de Talavera la Real.

lunes, enero 04, 2016

La Reselva

Alas vezis, lo que más cerca está es lo que menus conocemus. Estu passa con dos cortijinus que están entre la Calçá i la Cabrilla, junta Val-dela-Calçá. Es el terrenu que tradicionalmenti los parcelerus d'essa parti án llamau La Reselva.
Añus 50
 Quiciá que lo más curiosu d'estus cortijus no son las retrataúras, más bien es la estoria del topónimu. Comu muchas vezis passa enos puebrus que son ijus dela tabula rasa del Plan Badajoz, la toponimia es otra delas cosas que se descaecierun, naciendu otrus nombris que son liquiamenti del sigru XX baxu el régimi.
Añus 70
 Pal topónimu de Reselva encontramus el su origi enos conceutus de reserva i tierra exceptuada tocantis alas tierras que no eran sobrantis (las sobrantis eran las que passavan palos colonus). Essa tierra de reserva, que en estremeñu passa a dizil-si reselva, eran acutás palos propetarius peru contavan conas mesmas mejoras del regueríu que las demás. Estu quiel dizil que al aparcelá-las, las acequias, canalis, desagüis, pistas, bancalis, etc. no se cortavan al entral en estas tierras, pos tamién eran puestas de regueríu.
Añus 80
 D'acuerdu con Artemio Baigorri (1978: "Las trampas de la colonización: las reservas y tierras exceptuadas"), el 73% delas tierras regás pretenecían a esti régimi en 1977. Mesmu, dispués que se pusu en riegu la parti del Canal de Montiju el porcentagi de tierras de reselva, que alo primeru eran mu pocas las fincas de más de 125 ha, peru conas continas reformas legalis, los propetarius se divan beneficiendu dela trasformación delas tierras, peru sin tenel que despropiá-las.
Primel casa i navi
Nunca queará claru qué tierras se reselvavan, si divan pola caliá dela tierra, por sitación previlegiá o si quandu ponían el regueríu en ellas, los propetarius llegavan a pagal essas obras o las pagavan los colonus. Velaquí la razón d'essus colonus i delos puebrus nuevus i las casas aislás estal junta estas tierras: tenel jornalerus pa trabajal enos antiguus cortijus en el hondón, frenti al escaparati de sel nuevus propetarius de uertus i parcelas. Naidi cayó ena cuenta de que los puebrus nuevus están hechus precisamenti enas grandis fincas delas Vegas Baxas? Aquí, en Val-dela-Calçá essas fincas eran las dela Vara i el Condau, peru tamién avían otras más chicas comu los Carneriles, la Rabúa o la Rueda.
Puerta dela primel casa
Pa avial estas tierras de reselva, el estau ofrecía sunvencionis alos propetarius conas que aparcelal, hazel los bancalis, acequias, pozus i pistas i no le ponían los impuestus precisus por estal de regueríu. De má que truxu una precupación mayol del propetariu por sacal más renta alas tierras, más que ná, las que acabava de ponel de regueríu.
Chimenea
Huélligas de essi passau rezienti tenemus desperdigás por tolas Vegas Baxas. Los casus más cercanus al nuestru puebru es velaquí La Vara i esta pequeña reselva que enos mapas antiguus delos aparcelamientus reza con el nombri de Segundo Cuarto Chico. I chicu es dendi logu si lo acomparamus conas otras tierras, pos, d'acuerdu con el libru del puebru Historia cotidiana de Valdelacalzada (pág. 55), esta finca es de 37 ha i 55 a.
Detalli cona escrición dela chimenea (está escurecía del ordenaol paque s'aprecii)
En el mapa del aparecelamientu reza tamién los propetarius dela Reselva, las ermanas Juana i Petra Pérez Bautista, delas que ná ei poíu encontral. Namás ei poíu sabel que'l amu agora vivi en el Montiju i esperu poel palral con él i que me cuenti más cosas sobri esti Cuarto Chico.
Argolla
Lo únicu que agora quea en essas tierras son dos casas. Las casas de lavol son las tradicionalis d'esta parti estremeña: vivienda chica con chimenea i que está desapartá de otrus edificius comu quairas i navis.
Parti d'atrás conos naranjus
Dendi largu no se destacan en ná i quiciá conas retificacionis que án teníu qualquiera dava que son antiguuas si no huera pol testimoniu delos parcelerus que dizin que ya estavan allí enos primerus añus del puebru. Pa cotejá-lu, en efetu, las dos casas están ya enos añus 50 porque huerun retratás en el Vuelu Americanu, sigún vos pongu en el primel afotu. Las otras dos retrataúras son delos añus 70 i 80 del mesmu terrenu i se vein cómu angunas costrucionis se pierdin i otras se hazin, comu la navi de broquis pal ganau dela primel casa. Sin embargu, enos praneamientus previus del Plan Badajoz (añu 1939) i en el mapa ya definitivu del Canal de Montiju del INC (añu 1949) no pareci casa nenguna, más que los cortijus del Carneril al otru lau dela Cabrilla. Enos mejoris añus, piaras de vacas i guarrus se criavan en estas tierras.
Brocal de noria?
La primel casa es una costrución cenzilla con tejau a dos aguas dela que namás quean comu elementus arquitetónicus antiguus la chimenea larga tradicional i dos argollas palas cavallerías ala puerta. Ena chimenea ai una fecha i unas inicialis drentu dun abanicu (fecha arriba, inicialis embaxu), peru se véin mu borronosa por causa delas camas de pintura que lleva. Namás se lei claramenti
19?1
?C
Segunda casa vista dendi'l caminu
De frenti ai un brocal quairau de pozu que antañu púu tenel alberca i noria i pilonis, peru delos que ná sabemus, porque no quean ni los espárragus ni el andil. Si la casa huera de mediaus del sigru passau aquellu no sería de noria.
Puerta dela segunda casa
La otra casa está pa ponienti, uniá ala primel casa por un camininu. Sigún testimonius, esta segunda casa tenía un pozu antiguu, peru agora namás ai un pozu d'anilla junta el caminu.
Detalli dela ventana
Esta casa sí conserva más elementus antiguus, comu son las ventaninas de tabla i el poyeti. Ena parti de salienti renti la casa ai un suelu d'enrollau que, junta el que ai ena casa dela alverca del Cortiju Bonitu creu que son los únicus que se conservan en Val-dela-Calçá. El suelu de rollu está delimitau con ladrillus sigún apareci enas retrataúras. Tamién ai una terraza más moderna, seguramenti un cuerpu añidíu al original.
Enrollau
Lo mesmu la primel casa comu la segunda tienin árvolis comu pinus, olivus i naranjus adornandu la parti trasera, arrendandu los grandis cortijus delas vegas, con el su jardín detrás.
Ladrillu en el cantu del suelu
Estas casas son el testigu delos tiempus delas lavoris en el campu i dela su vivienda en él. Comu s'aprecia enos retratus cimerus, el sitiu es pocu salubri pala vida, pos son terrenus enguachinosus. Está en un recodu dela Cabrilla, más la propia Cabrilla parti la finca en dos i me maginu que anguna parti avería un vau pa passal enantis de queal el regatu comu un canal i de que s'enllenara d'atabúas. Dispués del aparcelamientu i el passu dela tragilla, la finca se pusu en regueríu modernu, queandu la parti entre la Calçá i la primel casa de uertus (comu diximus endispués, los uertus pegandu alas tierras de reselva, aquí la parti del loti 100 que se dividió en 10 uertus enos bamburralis dela Cabrilla, i al otru lau, pegandu alos Carnerilis i ala Calçá otrus lotis varius). Escassinas muestras dun passau borronosu i de difici entendimientu ondi el estau, las tierras, los propetarius i los colonus s'arrebujan ca unu conas sus necessiais i comenencias.

Bibliografía:
  • Traver Vera, Ángel. 1998. Historia cotidiana de Valdelacalzada.
  • VV. AA. 1978. Extremadura saqueada.
  • Testimonios orales

 

viernes, enero 01, 2016

La Navidá vareña

Estrenamus esti añu nuevu cona nuestra mirá escusá pola naturaleza delos nuestrus campus, riveras i regatus vareñus en estus días apagaus dela Navidá. El campu, verdi delos forrajalis i las malvas, conas sus florinas el xaramagu amarillu i el majuelu que cancanea, enseña los frutalis ena poa i las cañas, empelotinus. La postura de sol, naranja, s'enrea entre los pinchis delas arcacias i las varas sin cortal. Los lloronis se desojan a pocu a pocu i los charcus delas lluvias escassas son brevis al son dela queá del mielru i delos chíus delas grullas que en bandás atraviessas los cielus en cata del'agua. Buen añu 2016, amigus letoris.