jueves, agosto 27, 2015

Los Torrejones

Ayel tardi anduvi pala parti delos Torrejones. Avía tiempu que no raceava por essus baxíus. En una rinconá que has el términu del Montiju, justu por cima del Roete de Guadiana, entre las bocas del Lacarón i el Lácara i por baxu del cortiju de pa Pedro. Antiguamenti sería sitiu de novilleru, peru conas cequias que metierun i el aparcelamientu de tola parti aquella, agora ai grandis zonas de regueríu que pretenecin alas casas aislás de Barbañu. 
 El recorríu se hazi siempri por asfaltu, porque era una pista de cequia que aprepararun, de má que qualquiera ruta por aquella parti se hazi bastanti cómoda. Amás de vel restus de cortijus antiguus, çahurdas i casas aislás, el caminu passa entre frutalis, alfalfalis i viñas. Es una zona rica arquiológicamenti, atillá alas villas romanas comu la de Torre-Águila o la Floriana, enque ya no se conservan ni los materialis a frol de suelu por causa delas lavoris agrícolas. Pol topónimu del sitiu, los Torrejones, da que hue sitiu con restus de costrucionis duranti sigrus. 
 El ríu está asseñalau pola alamea de ucalitus. Es una pena que las dos riberas que abocan allí esté compretamenti tapás de tabúas. Pueis passal pol lau i ni apercebil-ti, sin sabel si aquellu es un desagüi o qué. No me molesté ni en tiral un retratu del vau que ai en el Lacarón.
 Precisamenti, en metá d'essa zona entrerríus se halla la ilesia delas casas aislás. Ai unus añus l'aprepararun comu casa roal, que dizin Casa rural Torreáguila (enque la dehesa de Torre-Águila cai pa ponienti, essa parti es la delos Torrejones). La arquitetura es la propia delas ilesias i escuelas delas casas aislás, enque dendi huera apeninas s'aprecia pol cercau i el barzu que tien.
 La torri se destaca ena llanura, ena lindi entre los Alisares i los Torrejones, entovía cona campanina. La próssima ilesia delas casas aislás está en Torre-Mayor, muchu más largu dallí. D'estas ilesias, que se conservan toas las que se hizun con el Plan Badajós, quandu menus l'arquitetura, quasi toas son ya privás, apreparás comu alberguis o están aburrías. Del patrimoniu del interiol, ná sabemus, ni tapocu l'avocación ni cosa nenguna, más que aprepararun la navi del templu de comeol.

jueves, agosto 20, 2015

Inciendu nel merenderu de Pueblu-Nuevu

El domingu passau pola mañana una coluna de humu se destacava pala parti del badén de Talavera. Cona quema de rastrojus d'estus días, nunca se sabi qué es lo que ardi enas Vegas Baxas. Sigún el ayuntamientu de Sarteneja queó dichu en el Facebook el domingu ala meyudía, no es la primel ves que lo ententan:
Hay fuegos intencionados en esta zona y van dos días seguidos, por favor a ver si entre todos damos con esta persona o personas que se empeñan en quemar la zona.

Unu delos muchus letrerus de respetal el ambienti que están pola ribera de Guadiana
 Dendi aí píin calavoración pa si angunu vé qualquiera cosa rala. El miércolis me acerqué cona becicleta pa vel el esgalaçu i si s'esparramó muchu. La parti delos aparcamientus queó cancinaíta, llevandu-si por delanti varius pinus nuevus i arcacias.
Arcacia quemá an pie del caminu
 Felísmenti, no se çalearun demasiau los bancus del merenderu junta las parelis delas esparrillas ni tapocu las costrucionis de maera comu la puenti de tabla que ai entre la charca i la parti que salió a ardel.
Merenderus que quearun arroeaus delas llamas
 El huegu se saltó pala otra parti del puenti, pondi las bocas dela charca del Traviessu que da pala charca de San Isidro. En esti lau se llevarun las llamaratás palantri varius ucalitus i chopus nuevus.
La planá dendi el portón canciná
 El huegu puu dil a más por causa dela fusca (ojas de chopu, de ucalitu, çarçalis, pastu) que abunda pallí, peru entre los bomberus i los caminus i las riberas hizun de acerus i no trascoló pala parti dela ermita, salvandu-si los lloronis dela charca, tolos estaribelis delos pescaoris, los pontonis i la propia ermita.
Mapa dela zona
Dispués delo que passó ena Sierra Gata o mesmu estus mesis atrás en Guaxira i del mal añu que llevamus de huegus en Estremaúra, que tengamus que padecel otra ves más la manu enferma resulta indinanti. Tapocu ayúa a essu que dendi el badén ata el Puente Roto veamus tol caminu'l muru prantau con pinus enas barrancas, choperas que no dexan ni passal la lus i ucalitus que hazin delos braçus viejus de Guadiana verdaerus bamburralis i ciénagas. Sin dizil ya los escombrius, corchus delos prantonis de tomatis esparramaus andiquiera, gomas de riegu i botis de curas tiraus entre los ucalitus en qualquiel hoyancu. Peol las cosas no se puein hazel.

Dendi aquí pegu el apitíu alos ayuntamientus delos puebrus delas Vegas Baxas paque hagan por miral pola riqueza del nuestru ríu, concenciandu los propius parcelerus que tienin las senaras an pie de Guadiana paque cudiin de que esté limpiu i adenunciandu quien sea osau de tiral escombrius i pestis. Pal que vaiga cona caxa de mistus, la lei lo espera.

sábado, agosto 08, 2015

Los andilis del'agua: El pilón del Cordel de Barbañu

Quien sigui las huélligas delos passus ganaerus polas Vegas Baxas se llevará chascu tras chascu. El misteriu está en que el Plan Badajoz, comu tantas otras cosas dela nuestra estoria, s'encargó de arramplal con ellu. I si no hue bastanti con ellu, las corrientis del modernismu delos últimus 20-30 añus arrancó pilonis, brocalis i norias a trocu de echal cimentu i barriás monótonas por cima.
Sitiu del pilón dendi el "vuelu americanu" ena metá del caminu
 Sin embargu, el Montiju es un casu estrañu en tola comarca, precisamenti pol bel respetau quasi que tola arquitetura ganaera del alreol. Lo mesmu pozus nuevus comu los del Valle o el delas Eras, que los pilonis delos abrevaerus más viejus se conservan desperdigaus al reol del cordel.
Vista dela parti del pilón diendu parriba
 En el cachu vá dendi la charca los Bueyes, ogañu dissecá, por detrás dela picina, hallamus un descansaeru del cordel encontramus unu delos pilonis con brocal.
El pilón
 El conjuntu está compuestu dun pilón de cantería de granu bastu i un brocal quairau de mampostería i ladrillu al estilu d'otrus brocalis con noria que ya conocemus dela zona esta.
Rebaxi en una delas lanchas de granu
 El pilón, verdaeru conteneol de vidrius i latas, tien una piquera d'aliviu debaxu i un rebaxi ena parti superiol, sigún vemus enos retratus.
Estau del brocal dispués dela retificación
 El brocal que está enteramenti revestíu i cegau. La boca está tapá i recubierta, lo mesmu que las parés. Presenta dos pergañus de ladrillu i baldosa, gracias polo que agora se puei aprecial un pocu los materialis del brocal. Por cima del cimentu aparecin pintás i rayonis delos críus çaleandu el ya de por sí brocal.
Materialis dela paré del brocal
 Pola parti d'arriba se vein entovía dos delos tornillus d'agarri dela noria cona que devía de sacal-si agua pal pilón. Enque no cuentu con testimonius oralis que recuerdin aí una noria, seguramenti la tendría pola propia estrutura del brocal i la conseña delos tornillus. Estu lo ajunta a otrus pilonis comu el de Torre-Mayor que ai junta el cimenteriu, de brocal con noria pequeña i pilón.
Conseña del tornillu de noria
Al reol está el sitiu prantau con escobas, chopus, acipressis i otras prantas. El pisu conserva angunus cachinus de bel estau enrollau junta el brocal. En sí es un sitiu agradabli, junta uertus i parcelas al lau del puebru, peru que no goza de respetu nengunu delos propius montijanus, siendu una esterquera palos botellonis i los desoficius delos moçanconis. El brocal está pinturraqueau i varias lanchas de granu del pilón tamién. En el 2009 arrancarun dallí las papeleras quasi sin estrenal. Paeci mentira que conos añus que lleva el pilón aí hincau i dispués d'apreparau i retificau pal vesitanti, el andarín o el ciclista, sea la falta de respetu i de concencia estórica las que hagan d'ellu una esterquera. Se trata duna delas pieças del passau que sobrevivierun al urbanismu sin barajeu, una pequeña parti dela estoria ganaera del Montiju conas sus ferias guapas i el tragín de resis del'Alcáçava alos novillerus de Guadiana... Pa respetal ai que conocel.