martes, diciembre 29, 2015

Los andilis del'agua: La Puentezilla de Talavera

Acontinandu cona serii delos andilis del'agua, que comu bien sabéis, es más propiu del veranu que d'estus tiempus, quieru trael-vus una puenti delas pocas que quean delos tiempus ganaerus i quandu los caminus eran realis: La Puentezilla, o comu dizin los talaveranus, La Puentessiya.

Oju dela puenti
 Prencipiandu pol propiu topónimu, damus que comu otrus que mientan los passilis, tienin nombri castellanu, no estremeñu o tradicional. Essu lo sacamus mesmamenti pol propiu sufixu -ezilla castellanu, frenti al -illa que sí está velaquí mu repartíu ena toponimia estremeña. Namás mental el topónimu de La Puentilla en Morcillu, sin el -ez-.

Estribus i ojus
 Enos trabajus de toponimia delas Vegas Baxas, tengu velaquí estu puestu:
Topónimo simple determinado derivado de puente (< lat. ponte). La terminación -ezilla en lugar de -illa remite a una nomenclatura castellana, no tradicional, a pesar de la conservación del género femenino. Se trata de un puente de ladrillo más moderno —aparece citado desde el siglo XVIII—. A pesar de su carácter marginal en tiempos modernos se conserva bastante bien. Se encuentra sobre un brazo de la rivera del Limonetes, a la salida de Talavera dirección a Badajoz.


Calçá apuntandu pa Badajós
 En el Montiju está otra Puentezilla, que'l retratu ya lo saquemus aquí, peru de otra hechura i el topónimu está destendíu bastanti por toa Estremaúra. Lo tenemus mesmu en Cabeçuela, arribota en el valli de Xerti.
Calçá cubierta de follarasca
 La Puentezilla se halla porcima dun braçu, agora secu, en tierra de valli que aboca cona rivera de Limonetis, mu cerca dun barriu nuevu a ponienti. El misteriu dela puenti está en que está costruíu en el caminu real que diva de Badajós alos Mairilis (lo que agora se has cona autovía A-5 que passa un poquinu más abaxu).
Detalli dela terminación del pañu el petril
 Esta puenti talaverana está hecha de mampostería de ladrillu cozíu provinciu, materialis mu probis peru de buen rehundieru. Tien tres ojus con arcus de mediu puntu achaparrau tamién de ladrillu enas dovelas, bien conservaus. Entre ellus ain dos estribus de tajamaris en picu arremataus tamién en pingurutu pola parti dondi bien la corrienti (sul).
Detalli delos ladrillus del petril
 El petril está hechu tamién de ladrillu, acostaus ena parti baxera i alevantaus ena baranda. Por drentu ain angunas pieças curiosas de cantería. Son pieras de granu con rayonis comu de sel sacás d'otru edificiu, seguramenti delas ombreras duna puerta. Una d'essas pieras tien una marca de canteru en L, delas pocas atestiguás en Talavera i que estamus en paragi de seguil envestigandu.
Piera de granu con rayón
 Estas pieças de granu están encrustás en el petril de dambus laus pa reforçal el ladrillu, peru angunus sin conocimientu están a arrancá-las dela paré.
Piera de granu encrustá

Piera de granu con marca de canteru
 Ai aujerus quairaus de desagüi una mijina por cima dela calçá dela puenti, unu por cima dela cravi del arcu del mediu i otrus alos laus delos tajamaris a destinta altura.
Aliviaeru del petril
Ala contra del Puenti Vieju, quasi que tó farrungau i sin cudiu ni entención de aprepará-lu, esta puenti de Talavera es un tesoru delos pocus que s'án conservau. Junta los brocalis delas norias, dela mesma hechura i materialis, son delas costrucionis más asseñalás en Talavera i que entovía puein vel-si. Muchas costrucionis son las que la estoria, la dejadés, el abusu i la inorancia derrotarun i aborrarun delos nuestrus campus i puebrus, de má que quandu entovía vemus en pie estas obras delos antiguus mos alegramus imensu. La Puentezilla es un patrimoniu delos talaveranus i delos estremeñus i que devemus de valoreá-lu. Sirva esti endilgu pa reparal en ella i enos ombris que porcima d'ella una ves pisarun.

lunes, diciembre 07, 2015

La toñá en Val-dela-Calçá

Hiziendu una escoja delos retratus del mes passau polos caminus i pistas vareñas me pareció aparenti sacá-la por aquí: quiciá que enos afotus vemus cosas que cona vista no apreciamus, peru la verdá es que quandu allega la toñá alas Vegas Baxas, los coloris delas ojas delos frutalis, delos atarfalis alos lubricanus, las naranjas i las malvas es delo más lindu que trai esti tiempu.















La ermita de Santo Toribio en Talavera

Ayel tardi anduvi bandeandu Talavera i alreol con el amigu Antonio que m'estuvu enseñandu sitius que cona becicleta no huera síu escapás de vel assín comu assín. La tardi da pa varius reportagis que diré pusiendu paquí a pocu a pocu, porque ai cosas talaveranas mu interessantis pa enseñal-vus por mé del blogui esti tocantis ala estoria, arquitetura i, comu no poía faltal, los andilis del'agua.
Mapa del sigru XVII
 Enos mapas más antiguus que tenemus (que ya lo saquemus en tiempu en el endilgu de Malpartía) apareci, velaquí, asseñalau Santo Toribio (Sto. Toriuio) ala parti de ponienti comu pobrau. Esti mapa es de metá del sigru XVII, susprendiendu polos detallis dela vega i los cerrus i más que ná, pola desparecía muralla de Talavera.
Mapa del Marqués de Tesse (1705)
 En un otru mapa, ya más tardíu, concretamenti del 1705 duranti la Guerra de Secesión, con ojetivu milital, aparecin asseñalaus los prencipalis caminus que llevan a Talavera i los vaus de Guadiana. Peru en el mesmu sitiu que'l anteriol se halla la ermita, tamién escrita comu Sto. toriuio.
Cara de ponienti con Talavera detrás
 La importancia milital d'esta ermita tuvu que sel bastanti antigua. La razón es llana: está junta un cruzi de caminus, guardandu el caminu vieju de Badajós a Talavera, en un cerrinu, un pocu antis dela entrá prencipal que tenía la villa, que era pol Puente Viejo. Está polo claru que el sitiu, más que santu, era de vegilancia, que junta la Rivera que hazía de fosu, el ríu Guadiana i las murallas hazían de Talavera un sitiu huerti pol norti i por ponienti.
Cara norti i cara de ponienti
 Seguramenti essas ruinas que quean sean los cimientus duna atalaya mora rehecha sobre angún puestu romanu (i quién sabi si anteriol). Los materialis i las conseñas sirvierun pa componel una ermita pala avocación de Santu Toribiu, que sigún Nicolas Díaz y Pérez, ena su Historia de Talavera la Real, es del sigru XV.
A la parroquia de la villa le estaban unidas las ermitas de San José, fundación del siglo XV; Santo Toribio, del mismo; los Mártires, que era del siglo XIII; Santa María de la Rivera y la capilla del Hospital; esto es, cuatro ermitas y una capilla, como expresa un curioso manuscrito que registramos poco há en Badajoz.

Canchu del muru
 El manuscritu que mienta esti autol es unu del sigru XVII con el nombri de Papel que declara las Iglesias de Talavera y de sus campos, que vinu a uebu pal estudiu delos sus edificius religiosus. Sabemus, o quandu menus barruntamus, que'l cultu a Santu Toribiu vinu del norti i tuvu assientu en puebrus estremeñus. El casu más cercanu, ena mesma Puebla, que queó farrungá dispués del temblol de Lisboa i que los datus que conocemus son tardíus, ya de primerus del XVII. Enos mis estudius de toponimia delas Vegas Baxas ena parti de Santo Toribio tengu velaquí estu:

Hagiónimo compuesto indeterminado. Se trata de una zona al noreste de Puebla de la Calzada, antiguamente de huertas, y que se trata sin duda de uno de los topónimos de los tiempos de conquista. La advocación a Santo Toribio hubo de venir a través de la orden militar de Santiago, por la cual encontramos dos ermitas, una en Puebla y otra en Talavera la Real, muy lejanos de su lugar de origen (Liébana, Astorga, Tuy, Lugo). En este punto, como en otros relativos a la administración, observamos cómo los cultos forasteros vinieron, o bien directamente con el clero o bien fueron populares. Teniendo en cuenta la escasa relevancia que hubo de tener el contingente de repobladores en la zona, hemos de suponer que el establecimiento de cultos, al igual que la administración de tierras era algo que se escapaba al pueblo llano, quien hubo de seguir con los suyos.


Una delas esquinas farrungás
 Comu passó ena Puebla, el cultu a Santu Toribiu se ofrecía en una ermita pahuera del puebru: ena Puebla era pala parti de salienti nel caminu del Montiju i en Talavera ena parti de ponienti junta'l caminu de Badajós. Enque los motivus pa estu ya sabemus que son segundarius i que'l cerru ondi se hallava la ermita era un puestu de vegilancia santiguau dispués.
Parti dunu delos murus
 Los restus quearun ala vista dispués del desmonti que hizun en el cerru ai añus pa dedicá-lu alas lavoris del campu. Estus restus son pocus, apeninas pa echal-mus una idea de cómu poía sel el edificiu. Se trata dun edificiu solu de pranta quairá con murus de muchu canchu (unus 60 cm). No se conserva la puerta ni vanu nengunu, enque pol comu está la paré que da pa ponienti, que es la peol conservá, barruntamus que aí estaría la puerta.
Detallis delos materialis
 Los materialis son delos que ya estamus acostumbraus en esta zona: congullus de argamassa con rollus de ríu, piera partía inregulal i cachus de ladrillu, sigún se vé enos retratus. Por tola cotorina del cerru se vén los rollus caíus que se mesclan con el cascajal que ya es de por sí el terrenu, amás de cachus de ladrillu i otrus materialis usaus enos murus.
Olivus dela laera norti del cascajal
Quandu menus tenemus los mapas i la decumentación gráfica i material de que en esti cerru uvu algu, cosa que no poemus dizil cona huerça delas ermitas i otrus edificius que mos cuentan las corónicas antiguas i los librus i manuscritus delas ilesias. El provechu que tien agora es el abrigá pa caçaoris o de sitiu de borrachera comu se vía polos cascus, botellas i vasus desperdigaus pol tol cerru. Essa es la estoria nuestra de tolos días, las ruinas que son parti dela nuestra coltura, si no son con pintás, con botellas i orinis i si no arramplás polas grás o las tragillas.

miércoles, septiembre 09, 2015

Los andilis del'agua: Los escombrius del correntón

No teniamus bastanti con tenel un caminu del muru con más hoyancus que ena Luna. Tapocu no era bastanti con tenel una acampá entanguilá nel cauzi dun correntón. Agora el nuevu enventu es el tiral los escombrius i los ripius en un braçu del propiu correntón. 
Mapa dela zona de 1933
 Enque los ucalitus lo incultin i mucha genti no lo sepa, la Isla Baldía no le llaman assina por caprichu. En efetu se trata duna isla. Los mapas más antiguus del catrastu i del IGN ni siquiera train una isla, namás ríu, una Guadiana que s'enancha.
Mapa dela Isla Baldía en 1949
 Los más rezientis train pintaus varius correntonis, siendu el prencipal el dela Branca comu apareci arriba. El braçu prencipal es el que passa justu ena parti baxera al passal l'acampá d'agora, siendu el braçu superiol sitiu alagaízu con charcas i que se llena enteru quandu vien el ríu aventau.
Retrataúra vuelu americanu (añus 50)
 Ena retrataúra del vuelu americanu s'aprecia ya hechu el muru aprovechandu un cachu del antiguu caminu del vau Talavera con dos charcas grandis que pretenencia al propiu correntón i otras más chicas que es ondi está agora el aparcamientu dela acampá.
Ripiu nel braçu del correntón
 Pos bien, dendi ai unas semanas unas montoneras de ripiu i escombrius no sabemus dóndi están allí tiraus, en el mesmu sitiu alagaízu del correntón.
Vista del braçu usau d'aparcamientu ogañu
 Tó essi braçu está allanau pal aparcamientu, cosa que en tiempus de seca comu agora no está maleju.
Retrataúra del mesmu sitiu ai un par d'añus
Montoneras dendi cerca
Peru enos tiempus d'agua que ya mesmu entraremus el sitiu prencipia pol manal parriba, retenel las aguas de lluvia i alagal-si. Sí, aí, ondi está essa montonera de ripiu. Porque el'agua busca el su sitiu i agora lo están entamponandu sin ton ni son, no con barrancas de tierra namás, ara tamién con escombrius i pestis. Quandu pensavamus que más mierda no cogía en Guadiana, velaquí otra poca más. Vergonçosu.