martes, diciembre 23, 2014

El verdaeru infiernu de Val-dela-Calçá

Quandu desconocemus la estoria dun sitiu es faci marrá-la enos rétulus, enas obras, ena mentación, enas referencias. Essu passa en el mi puebru, ondi mesturan el nombri las charcas i las riveras i regatus. Es la condena delos puebrus que pierdin la estoria i encima son de hechura moderna, comu lo es Val-dela-Calçá.

Corrientimenti vienin mentandu una charca que hue adecentá pala pesca, pala parti del Puente Roto, la Charca'l Infierno. Sin embargu, los viejus del puebru i los mapas más antiguus concidin en que essa es la Charca las Yeguas. Lú, óndi está la Charca'l Infierno? Essistió anguna ves? Se confundi la CHG, los pescaoris, los mapas?

Mapa del INC dela zona descrita (1949)
 La referencia más antigua que ei encontrau se trata dun mapa de 1949 hechu pal INC que es ata agora del pranu más compretu en toponimia i más fiel ala sitación delas Vegas Baxas enantis dela hechura del puebrus.
La Quebrá Arenosa, agora desagüi
 En essi mapa está asseñalau el caminu de Talavera al Montiju, que ya venía asseñalau en otru anteriol, del 1933, o comu vien esti el que vá ata la Calçá Romana. El caminu ya hechu pista se conserva quasi que tol tramu, dendi las graveras junta'l Muro ata la Quebrá Arenosa. El siguienti tramu es el que está en el puenti nuevu ata la Calçá, peru d'essi, ya palraremus otru día.
El vau la Quebrá Arenosa
 Essi caminu conserva el destraci antiguu dendi'l vau la Quebrá Arenosa. D'esti vieju vau entovía puei aprecial-si el desnivel del caminu con relación al canal que passa renti del tol caminu. La quebrá s'aprecia menus porque muchus crein que es un desagüi, peru en verdá era una quebrá natural que desaguava ena Charca'l Infierno.
El caminu de Talavera al Montiju
 El caminu passandu el tramu de vaus (ai un otru vau más palantri d'otra quebrá, peru ya quasi que ni se destingui) ya vá derechu direción sul-ponienti ata abocá en el Muro, enos hoyancus dela gravera.
La Vega'l Infierno
 Cerca del caminu va paralelu siempri la Quebrá Arenosa i otra quebrá más chica que no apareci el nombri, ata moril ena Charca'l Infiernu.
El Regato'l Infierno
 Agora sin agua, más lindón con acirati que un regatu, se aprecia por cima la vega del propiu regatu i la caxa del regatu al norti delas graveras.
El Regato'l Infierno dendi un bancal
 Un tramu antis dela charca, la caxa s'enancha i prencipia a tenel más umidá i fusca, barruntandu la presencia dela propia charca.
La Charca'l Infierno
Hiziendu un recó la balsa d'agua s'aprecia claramenti, reteniendu agora las aguas de riegu i la lloveriza, enque nunca sabemus quándu volverá a correl el'agua pol Infiernu.

La razón del topónimu, bastanti común por Estremaúra, quiciá se halli pola hondura del terrenu antiguamenti. Devemus de pensal que agora el términu del puebru está mu llanu por estal hechus los bancalis delas parcelas, peru enantis de passal las tragillas se vedrían cerrinus, quebrás, hoyancus i regatus. Mos quea muchu que aprendel del nuestru puebru, sin perdel nunca la huélliga del terrenu, ondi los que dan por desagüis eran regatus de ranas i los que son agora parcelas que s'alagan con una poca d'agua eran lagunas i charcas.

jueves, octubre 09, 2014

Articulinus ena revista de feria de Val-dela-Calçá

Velaquí los atillus pa poel leel los dos articulinus que m'án sacau ena Revista de feria y fiestas de Valdelacalzada 2014. Desquitandu el hormatu i el tracamundeu de tipus, atendei al conteniu. Buena letura!

sábado, octubre 04, 2014

Los andilis del'agua: La Charca la Ermita

En el términu de Torremayol, por cima del caseríu, junta'l caminu la Nava, entre'l Llano i las Puertas, sobressalienti entre frutalis i forrajalis ai un cerrinu. La toponimia adeclara allí una ermita, "La Ermita", tantu enos mapas denantis del Plan Badajoz comu enos más rezientis. Sin embargu, no se aprecia conseña nenguna d'essa ermita, más que una casa vieja i farrungá ya cerca dela vía i essi cerru.

La Charca la Ermita
Piera del sitiu con lasconis
 Hechu de piera i grandis cortás ena barranca i un espigón, el cerru se halla a estilu península arroeau d'agua. Se trata dela Charca la Ermita, dela que ná sé desquitandu lo que asseñalan los mapas. Comu era tarditu, no me vagó pa preguntal alos dela Torrita a tentu d'essa charca, si es nueva, vieja o qué.
 Pal casu que un regatuelu vien asseñalau junta'l Lácara pondi está agora la charca, peru la charca no vien asseñalá enos mapas más viejus.
La charca i por detrás Casarenti
 Sí que vien asseñalau en el horcaju delos dos caminus, entre mediu, el sitiu dela ermita, dela que ná ai, desquitandu angunas pieras grandis, seguru que despresas del cerru, ondi do que estava el edificiu.
Hitu ena cimera del cerru
 La toponimia dela zona endica "Los Mártires" pa tola parti norti del puebru antis dela vía, assinque seguramenti huera essi el edificiu: la Ermita los Mártiles. L'avocación alos mártilis es bien corrienti enos puebrus dalreol, los más cercanus, la Puebla (entovía está, peru repuesta comu la dela Pura) i el Montiju (dela que ná quea más que'l recuerdu ena parti del Cotorrillo). En tós tres casus, las ermitas se hizun pa huera del puebru ena antigüedá, enque agora el sitiu esté ena Puebla i el Montiju drentu del cascu urbanu, antañu se hallavan desapartás del puebru.
Secaerus del Llano

Espigón

Vista del cerru dendi abaxu

Cortá del cerru
Comu quasi que tol patrimoniu arquitétonicu, qualquiera que huera la fecha dela su costrución, que se hallava en tierras de regueríu, esta ermita acabó despareciendu. Las tragillas arramplarun con villas romanas, molinus, ermitas, çahurdonis, parelis de tierra o piera... Si no huera por mé dela toponimia, ya no mos queava ni l'acordança.

domingo, septiembre 14, 2014

Los andilis del'agua: El vau de Lurianilla

Al norti de Pueblu-Nuevu, más pallá del Alcheí, siguiendu el caminu vieju de Talavera a Morantes, encontramus entre las dehesas del Cinchu i Cabeça-Ruvia un antiguu vau.

Sitación, sigún el vuelu americanu
La lindi es la rivera de Lurianilla (entovía enos mapas modernus reza comu Lourianilla) i que vien corriendu dendi las sierras de San Pedru. Enos mapas antiguus apareci por essa parti asseñalaus un hornu de cal i una huenti. El hornu no me vagó de buscá-lu (las tardis ya no dan tantu de sí), peru la huenti que estuvi bandeandu cona becicleta tola orilla no hui escapás de dal con ella. Ai mucha çarça i fusca de ribera... en el casu de que no l'aigan derrotau, puei que esté enos bardalis de renti'l caminu.
El vau
La rivera está seca de manera entrebolá. Ai cachus andi está el'agua estancá i otrus sin agua nenguna, de tolas hormas, no lleva corrienti en veranu. El vau está en un sitiu un quantu-quantu más alçau, peru en iviernu  corri porcima el'agua sigún s'aprecia ena vegetación dal lau.
Lurianilla con una poca d'agua
Rollus del pisu
El passu no tien las grandis lanchas ni passaeras d'otrus vaus que ei vistu, namás quean los rollus del hondón. Quiciá que por no sel mu grandi la corrienti que llevi esta rivera en tiempu metíu en agua.

Cancela aburría entre dambas fincas




El caminu si qué tien guácharas i regateras de passal por aí las correntías que ajorran dendi los cerrus de Cabeça-Ruvia a desagual allí.
Caminu diendu pal Cinchu

Caminu pa Cabeça-Ruvia
El lugal no puei sel más chocanti. A un lau dela rivera, los frutalis delos regueríus se destiendin por tolos cerrus junta'l canal del Montiju: ala derecha dela rivera, la dehesa tradicional estremeña.
Enzinal de Cabeça-Ruvia

Bellotinas

Enzinal con pastus secus
Hazi sensación el cambiu tan broncu que ai dun lau a otru de Lurianilla. Enas Vegas Baxas cuesta creel que un día el paisagi huera tal que assina, tó enllenu de enzinas, alcornoquis, chaparrus, xaras, coscojas, etc... i agora namás que esté la quadrícula delas parcelas con el polvu delas curas i los surcus derechus.

lunes, julio 28, 2014

La Nava

Al norti del términu del Montiju, que bastanti largu es, dendi Guadiana ata llegal abati alos pies dela Sierra de San Pedru, está el puebru dela Nava. 

 El puebru tien un topónimu corrienti, 'nava' dá que el sitiu se halla en sitiu llanu con angunus cerrus i charcas al reol. A tentu del apellíu, es modernu, pos los nombris que tuvu en tiempu eran los de La Nava del Membrillo o La Nava de Mérida. El escúu lleva un bembrilleru comu seña del topónimu, cona crus de Santiagu al mediu. Los delos puebrus dal reol llamamus simplimenti La Nava.
 Pola reonda dela carretera al Montiju entramus i encontramus un pilón que según me dixun los vezinus viejus del lugal lo vidun de hazel. Es un pilón grandi de hechura i materialis modernus, desquitandu la parti del cañu que es de ladrillu que estuvu cubiertu, peru que la cobertura la quitarun.
 La callis del puebru son bastanti derechas i anchas, con buenas travessías entre ellas. Las casas son de labraol de dos prantas, ventantas alargás i rejas de forja al estilu delas casas que tenemus enos puebrus viejus dela vega, peru cona novedá de que abundan los elementus de piera de granu. De má que se vein más ventanas i puertas con toças i ombreras de piera, dá que la materia prima la tienin bien cerca polos muchus naceerus d'esta piera hiziendu imponentis canchaleras enas dehesas cercanas.
 Algunas ventanas con balcón tienin más adornus ena su forja, enque son pocas las casas que conservan los elementus tradicionalis. Alguna que otra casa tien ventanas con celosías.
 Las casas dela genti de media capa son duna pranta de fachá larga i con ventanucu por cima dela puerta. Lo mesmu que passa palos puebrus dela vega, ván entrebolás enas callis más viejas, queandu mu poquinas sin alicataus.
 Angunus cachus delos enceraus conservan las lanchas de piera, peru están quasi que desparecíus comu passa en el Montiju i ena Puebla. Los que avían ena Puebla ena calli Calçá los taparun rezientimenti.
 Comu exempru delas puertas falsas tradicionalis vos traigu esta bastanti bien conservá de La Posá, conas ombreras baxeras de piera i piringutus, arcu rebaxau  i roeras. Tamién conserva la argolla p'amarral las cavallerías i un letreru en azuleju con el nombri en estremeñu.

 De frenti ala posá vemus una costrución moderna a manera de capilla que arrienda las capillas d'esquina portuguesas con una espadaña i en baxu tras una reja i cristal el imagi de Santa Quiteria, que conoça la única avocación que essisti d'ella en Estremaúra.
 El monumentu más importanti del caseríu naveñu es velaquí la ilesia dela Assunción. Lo mesmu por drentu que por huera está llenitu d'estoria i símbolus. Comu por drentu no mos dexarun de retratá-la, namás vos traigu lo que se vei dendi la calli. 

Escúu
 Quiciá que lo que más sensación haga sea el esgrafiau dela parti norti i salienti dela ilesia. Los dela parti norti están peol conservaus, peru los baxerus entovía s'aprecian tras dela crus delos caíus.
Esgrafiau dela paré norti
 Los dela parti norti imponin pol tema i la variedá de santus que están dibujaus. Entre los bichus ai lagartus, aspecii de crocodilus, culebras de dos cabeças i pecis. Alogu piernas i otrus remus, cabeças i yelmus. Ena parti cimera ala derecha ai una crus de calvariu. Los del lugal no sabin de qué puea sel i yo propiu no ei síu escapás de encontral ná a tentu d'ellu. Pareci la escena dun naufragiu con mostruus de ríus comiendu-si biembrus de guerrerus al torteruelu.
Detalli esgrafiau conos biembrus i los yelmus

Culebra de dos cabeças

Esgrafiau dela paré de salienti

Lagartu
 Los que están en el rincón que hazi de la paré pa ponienti están peol conservaus. Parecin estus santus ya vegetalis, enque ena parti baxera se halla un curiosu lagartu con una escrición compricá de leel. En parti darriba apreciamus un bocarrúu cenzillu peru ya sin usu.
 Curiosus son los arcus del estribu que vemus en esti lau, con dobri arcu i en cantería. Son mu pocus los sitius en Estremaúra con esta crassi de costrución.
 Ena fachá alvertimus un oju en ladrillu vistu, aparecíu al que tenemus en La Garrovilla, en una paré que es de sillaris inregularis calçaus con piçarra i piera branca.
 La puerta es de sillaris, con un arcu de mediu puntu sin adornus, namás que por cima un hornichi sin santu.
 La torri está desapartá del cuerpu dela ilesia, peru está unía con un otru arcu. Está bastanti bien conservá, con piringutus ena parti darriba, el uecu delas escaleras hiziendu otru cuerpu añidíu i arribotota la el relós i dos cruzis, siendu la que está justu por cima del relós la de Santiagu.
 La torri tien parti de cantería, mampostería i ladrillu vistu al estilu d'otras costrucionis religiosas dela nuestra parti, cona suerti de que ena Nava están ala vista i no án síu luzías.
La Nava á perdíu muchu dela arquitetura populal polas mesmas modernuras que atacarun al restu de puebrus dela vega, queandu pocas fachás antiguas. La huerça delas casas tien luzíus, çócalus d'azulejus o están pintás de coloris. Pocas casas conservan tamién la forja antigua o la horma delas puertas falsas. Polo demás, en mediu de toas essas modernidais encontramus una ilesia mu bien cudiá, cona hechura propia delos edificius religiosus dela nuestra zona i cona curiosidá del esgrafiau que relata algu que nusotrus agora no entendemus i del que esperu tenel informacionis, porque es, junta al dolmin del Lácara, lo que quea espasmau al vesitanti.

martes, julio 22, 2014

Las lanchas de Lácara

Enque se desvía un quantu-quantu delas nuestrus andilis corrientis, no poemus entendel la parti delas Vegas Baxas sin vel que está por cima d'ella.

La distancia i el que s'escapara del esgalaçu arquiológicu que supusu el Plan Badajoz has que la parti más al norti del términu del Montiju, ya pertenecienti ala Roca, Méria o La Nava conservi el patrimoniu delos antiguus bastanti mejol que pabaxu.
Alreoris con nacimientus graníticus
 Ena dehesa i enos olivaris andi las máquinas no án çaleau el terrenu s'encuentran joyas comu la del nombrau Dolmen de Lácara. Es velaí, unu delos restus primitivus que alos ombris d'agora cuesta d'entendel.
Casilla hecha conos materialis dela zona
 Assitiau junta el Plau del Lácara, en una horca andi s'ajuntan varius regatus ala rivera del Lácara, tenemus una delas costrucionis megalíticas más anombrás de toa Estremaúra. Dispués del adecentamientu que hizun pa promovel el monumentu, qualquiera puei vesitá-lu i çamargullil-si ena estoria más honda i desconocía delos antiguus. El resultau: queal-si conas esquexás desencaxás.

No quieru palral muchu, porque el artículu d'esta semana quieru dedicá-lu a esti tesoru de tolos estremeñus. Por essu vos queu aquí las retrataúras... el testu, el domingu en el pedióricu.
Tallisca entre dos canchus, demasiá derecha comu pa sel natural

Perimetru del dolmin

Parti dahuera

Ombreras con rebaxis i primel toça

Ombrera de drentu

Salamántica junta una delas hiendas

Lancha de paré

Toça dela terminación dela colá con rebaxi por cima pa assental piera

Lancha más sobressalienti

Otra delas sieti lanchas del reondel

Hiendas pondi se partió la piera

Lanchas orizontalis i verticalis

Otras lanchas lavorás del yacimientu

Piringutu bien tallau

Tapaera con hoyinus

José Manuel Jerez a tiral retrataúras