miércoles, septiembre 18, 2013

L'Alcaçava pol cordel de Barbañu

Alegra la vista los verdis i brancus dela primavera, peru el amarillu junta las riveras alo últimu del veranu no disgustan: más, se gozan con una especii de mangria polas tardis que vuelan en setiembri. En cata d'essus coloris hui esta tardi i pa essu tuvi de dil largu, por caminus pocu transitaus, ata dal con el cordel de Barbañu.


Mapa dela parti retratá
 Cogiendu un día más el caminu del'Alcaçava pol Cerru Gordu, ahilamus palantri en busca dela Dehesa Nueva, una delas esquinas del enormi términu de Méria que s'entra en el del Montiju.
Vega del'Alcaçava
 Los olivaris, la tierra colorá se vain perdiendu ata dal con una vega llana de pastus, ogañu vazía de ganaus, antañu, términu del vieju cordel. Varius caminus atraviessan el caminu l'Alcaçava, el primeru, el dela Verea Colorá, la que atraviessa los Arenales, paralelu del cordel i que vai pal cortiju del Paxaritu. 



 

Caseta del Paxaritu

Camino del Montijo,

enos Arenales,

se perdió el librillo 
delos cantares.
La Verea Colorá buscandu los Arenales

 Siguimus buscandu el cruzi con el caminu del Zánganu i vemus dos grandis cortijus, el de Capote i el de Juan Bautista, arroeaus dambus por un prantonal de olivus que subin i abaxan polos lombus escurus i derechus. Un regatuelu sin nombri atraviessa el olival callau pola huerça del veranu.
El cortiju de Capote

Prantonal

El cortiju de Juan Bautista
 Por fin apareci el cruzi, antigua autovía de frailis i ganaus, el caminu'l Zánganu que vien a moril andi naci el cordel de Barbañu: en l'Alcaçava.
El caminu'l Zánganu
 El caminu passa pola chova del cortiju de Juan Bautista, que con una aparencia moderna pocu tien de vel con la fachá i los techus del antiguu cortiju. A pocu a pocu, hiziendu ringurrangus entre el prantonal vai ajorrandu el caminu ata dal cona rivera.
Pal vau
 Allí un vau anchu atraviessa la rivera entre dos charcus, seguramenti pocu que vel conas corrientis del iviernu, que los viejus frailis temían más que ná si tenían que passal por aí. Essi es el testimoniu de Antonio de Truxillo, quien en 1693, en contandu-mus la muerti del fraili Domingu del conventu de Luriana, dizi:


«No obsſtante ſe dize paſsò la Rivera de la Alcaçava, que corre junto al Montijo muchas vezes en ocaſion que iba ſumamente crecida, y que en ninguna manera podía vadearſe».

L'Alcaçava

L'Alcaçava
 Sigún mos arrimamus alas cuestas delos cerrus del'Alcaçava el cordel se retuerci en retortuñas i el pisu del caminu se racha polas correntías del iviernu que hozan entre las barrancas. Dendi arriba, a 241 metrus, se vein los destensus campus montijanus i meritensis, los enzinaris dela dehesa al norti, los olivaris nuevus alos pies i los cortijus brancus chalpicandu los retratus.
Vistas dela vega del'Alcaçava. Al fondón, los cortijus de Capote i Juan Bautista
 Matas de verdis repegonis i d'otrus secus, alguna xara, chaparrus i enzinas tupin las laeras delos cerrus que comu lenguas s'avançan sobri la rivera buscandu bebel dun'agua que no está i ala que nunca llegan. Dozenas de lenguas dun Tántalu sequíu que alampa pol verdol dela Alcaçava.
Vegetación delos cerrus

Las lenguas de Tántalu
 Demientras la rivera sota con sus retortuñas ahuyi a pocu a pocu delos cerrus pa perdel-si el su manantíu acullá.
Los ringurrangus dela rivera

Olival de Maça
 La tardi mos dexa el verdi azituna i las escobas, el caminu rotu del cordel, de patrás atravessau por piaras, conociendu oi las rueas delos tó-terrenus i d'algún ciclista apantujau.
El cordel formi vai subiendu

Pinus del cordel
Estas lindis del Montiju son, dispensin el juegu de palabras, delas más lindas tierras que tien. No entendemus oi, i menus en veranu, cómu era tan importanti essi cordel que diva de Guadiana a l'Alcaçava, qué pastus precuravan los ganaerus, quántas recuas colarun por essa tallisca, quántas piaras ajorrarun ala feria del Montiju... Mentris que lo pensamus, amus a cantal la copra delos frailis:

Camino del Montijo
van doze frailes
tós llevan alforjas 
chicas i grandes 
i detrás delos frailes 
van doze monjas
camino delos frailes
delas alforjas.

sábado, septiembre 14, 2013

El cortiju del Cerru Gordu

Renti ala carretera dela Roca, diendu pol caminu que bordea por arriba l'Alcaçava, está el Cerru Gordu, una delas alturas mayoris del términu del Montiju. El añu passau vesitamus el propiu cerru, almirandu las vistas que dendi allina ai de tola Vega. Esti añu vesitamus el cortiju del cerru.
El cortiju del Cerru Gordu en 1956
 Pocu muarun las cosas dendi la metá del sigru passau: el cortiju sigui lo mesmu, cimeru nel cotorru, arroeau d'olivus.
El cortiju ogañu
 Gracias que estava el guarda del cortiju i m'anduvu mentandu d'él que tendrá más de cien añus, dela quinta de muchus que ai por allí. El espetu assín lo demuestra, pos es dela mesma crassi que se vein en tola parti delas Vegas Baxas, cona vivienda de frenti, el corral i las quairas detrás.
Caminu d'entrada al cortiju
 La fachá del cortiju no tien adornu nengunu i el techu en pocus cachus conserva la teja, ogañu tapau con uralitas. Tien dos puertas, la prencipal i la de serviciu i tres ventanas largas conos hierrus dela forja manteníus.
Fachá del cortiju
 La chimenea dela cozina es larga i está sobressalienti i ena parti de frenti ai una otra ventana superiol de quartu, más chiquina, igualmenti cubierta de forja.
Vivienda

Chimenea i aperius
 Pola parti dahuera están los aperius comu la pala o la horquilla i varius tajus de maera.
Ventanas

Detalli forja
 Las parelis están desconchinchás en muchus laus, peru gracias que sigui acupau entovía tienin un mantenimientu que lo conserva dela ruina. Las parelis del corral son las que peol están, arreparás a cachus con broquis de hormigón.
Paré del corral
La hechura del cortiju es de ladrillu i tierra tupía en algunas parelis, lo que demuestra que es no es un edificiu postinosu. Amás, comu diximus endispués, no tien adornu, desquitandu la forja delas ventanas. D'esta crassi vemus cortijus enos Carnerilis i ena dehesa montijana, casas pequeñas de lavol que pocu tienin que vel cona grandeza del Pajaritu, la Vara, Cien-Ventanas, Morantis o la Rueda, más señorialis.
Me comentava el ombri que dendi aí se vía pola nochi las luzis de Feria i es que cona poca altura que tien el cerru se vían sierras lejanas del sul i del norti, lo mesmu que las Cuestas, los Arenalis, las Vegas Baxas o la dehesa. El'agua cerca i los olivus retuertus por tós laus muestran comu se destacan los destintus paisagis palos que ain costrucionis comparantis.

jueves, septiembre 12, 2013

La harinera del Montiju

De frenti ala estación de tren del Montiju hallamus unu delos edificius más importantis del sigru XX: la harinera.

Vista dela harinera, la estación i el barriu en 1956
 Se trata dunu delos edificius que mejol representa l'arquitetura endustrial de primerus del sigru passau. Abati si cumpri los cien añus i entovía es escapás de almiral la reziúra delas sus parelis.
Harinera ogañu
Pocas son las enteracionis que tenemus al tentu d'esti edificiu. Apeninas lo que mos cuenta la página Andando por Extremadura.

  La estación tenía una disposición de vías similar a la de La Garrovilla, situación que cambió en 1920 cuando se instaló un apartadero de la Sociedad Electro Harinera de Montijo para dar servicio a la fábrica de igual nombre, construida en 1919 por los maestros Cristóbal Sánchez García, Modesto y Antonio Cabezas, José Marín y Antonio del Viejo Barrena.
   El apartadero de la harinera constaba de una vía perpendicular al haz de la estación y comunicada a él por dos placas giratorias situadas en las vías mas extremas del haz; la del muelle y la más alejada del edificio de viajeros.
Fachá
 Ena fachá, en letras grandis i conos tipus dela epoca reza i entovía presenteras: Sistema la Electroharinera de Montijo.
Navi i puerta lateral
 Son varius los edificius, peru compricau de relatal la desponel por mé delos retratus ya que está tó cercau con parelis de tierra que ya están farrungandu-si a cachus i desconchinchandu-si a otrus laus.
Detalli techu del edificiu de salienti
 Associá ala fábrica vemus un barriu de casas dela epoca junta un caminu que lleva alos uertus montijanus de tradición mora.
Barriu
 L'arquitetura d'estas casas mereci tamién una mentación, pos entrecalan las parelis de tierra con murus de ladrillu i pieras dela dehesa montijana, formi vimus en un endilgu anteriol ena Guita.
Detalli paré

Casa

Detalli casa
Sedría una pena que s'echara a perdel esta linda parti del Montiju, los murus duna epoca ondi la endustria harinera pulava enos puebrus de paquí. Ogañu la parti aquella dela vía i delas Tierras Gordas sigui acogiendu tola endustria huerti del puebru, peru junta las imponentis navis d'ogañu están las d'antañu mirandu el navegueu delos trenis i las gentis, farrungandu-si a pocu a pocu... Pobraus i barrius que nacierun pa un oficiu muerin con essi oficiu si l'albeliá delos ombris no le da otru gastu. Assín se desparecierun los choçus del Alemán, los viejus molinus i mesmu los cortijus conos su choçus están a derrotal-si...