sábado, agosto 10, 2013

Los andilis del'agua: El camino Villar del Rei

Saliendu delas Vegas Baxas, de chopetón, s'espetan los olivaris, los enzinaris i la dehesa. La muación del paisagi es repetinu, desapartandu-lu alas vezis una cequia, un canal, una rivera o un regatu. Al otru lau del reguedíu, el mundu pareci que se quea estancu: las vacas braman polas desanas o s'abruzan enos fonchis, mentris que las enzinas enretortás suportan los 40 graus dandu colol alos pastus amarilluchus.

Mapa dela parti pedaleá
 El caminu que llevava de Talavera a Villar del Rei era largu, atravessandu dehesa i más dehesa, por secarralis imensus. Era la vía que tenía que seguil dendi los puebrus dela sierra del norti pa procural la vía de tren, ya que la estación de Talavera era andi moría esti caminu.
El Pesquero
Sahurdas
 Peru comu es impossibli correl esti caminu enteru embaxu del sol d'agostu i porque está tupíu de fusca, namás vedremus parti del caminu, sigún mos lleva a él dendi Novelda pol caminu'l cortiju las Monjas. Lo primeru que se destaca ala derecha son los edificius del Pesqueru, finca eterna que abarca dendi Guadiana ata Val-Mojau pola que passan importantis riveras comu l'Alcáçava o Guerrero.
 Varias costrucionis dela finca comu sahurdas i casillas ván esperdigandu-si pol caminu entre enzinas i alcornoquis.
El camino las Monjas
 El caminu las Monjas es largu i desigual, con cachus buenus de pista i otrus hozaus polos regatus que se saltan, hiziendu que los baxus i los vaus estén con pieras i bochis.
Charcu
Aguas-Branquillas
 Ata tres regatus lo atraviessan ata llegal al cruzi con el caminu de Villar del Rei. Delos dos primerus no ei síu escapás de verigual el nombri: son regatus que cargan en iviernu i primavera i ván corriendu dehesa abaxu por Val-Mojau, la Enzinosa i las Monjas delas muchas minas que sirvin d'abrevaerus.
 El tercel regatu es el de Aguas-Branquillas que es el que trai agua, mesmu en veranu i que tien nacencia pa Val-de-Sequera, ya en el términu de Villar del Rei. Por cogel ena su caxa las aguas de algotrus regatuelus más chicus llega a moril ala rivera de Guerrero con bastanti caudal, mesmu en veranu.
Puenti sobre'l regatu de Aguas-Branquillas
 El passu antiguu por Aguas-Branquillas no se conserva: lo que vemus ogañu es un puenti nuevu i que por causa dela fusca no se puei vel el passil o las pieras.
El camino Villar del Rei
 Endispuesinu está el cruzi con el caminu que ajorra dendi Villar del Rei. La parti que s'adrenta ena hesa pareci un caminu de sesmu, estrechandu-si polas fincas i la fusca.
El vau ena rivera de Guerrero
 Peru es la parti que ahila pala estación la que mos interessa, pos de ná que ajorramus mos topamus el vau pol que s'atraviessa la rivera de Guerrero. El sitiu á de sel un vau mu antiguu pos la su sitación está bien estudiá: vemus cómu el caminu passa en una parti alta dela rivera, precisamenti enantis de cogel las aguas del regatu de Aguas-Branquillas, de má que está duranti muchus mesis secu o con charcus enas partis más hondas. En veranu namá se vei el fondón de piera entre arvus de ribera i enzinaris. Es unu delos pocus vaus conservaus enas Vegas Baxas i que está tal qual. En otrus endilgus conocimus el delos Limonetes pol caminu a Malpartía i el del'Alcaçava, Alcaçavilla i el de Guerrero pola cañá delas Bardocas.
Guerrero secu
Forrajal
 Seguimus pabaxu atravessandu las tierras del'Atalaya con destensus forrajalis cosechaus conos conocíus pola parti esta comu pivus de reguedíu. Enque la parti esta apareça comu un secarral es sitiu de mucha agua i preva d'ellu son las dozenas de regatus, minas, chavarconis i fonchis que se vein polas fincas. Contribúi a ellu el passu cercanu del canal de Montiju, que surti las Vegas Baxas peru tamién estas tierras altas que tienin enas parcelas del Alcheí o Novelda frutalis, maís o tomatis. Peru esti viági mos amus interessau namás pola parti de secanu, que es la que mejol testimoniu mos puei dal de cómu estavan las Vegas Baxas enantis del Plan Badajoz.

El camino Villar del Rei
 Pol caminu arenosu i de subibaxas vemus algunus cortijus i vaquerías dela parti de Cabeça-Ruvia. En ellus se puein aprecial costrucionis curiosas de ladrillu i piera de granu en el suelu que no atinu a verigual la su función.
Costrución de ladrillu
 Esta vaquería tenía retinta, con la tableta pola parti d'ahuera que asseñalava la denominación Ternera de Extremadura i dendi logu que sitiu mejol no puein tenel pa criá-las. Tienin dehesa, pastus i agua ata tempral-si i el ambienti no está tan envarbascau comu más abaxu ena vega por causa delas curas.
Vaquería. En el suelu s'aprecian murus de piera.

Palomeu
 En essi mesmu caminu arreparamus en un cachu andi se descubrin pieras duna vieja calçá. Es compricau sabel el origin, si romanu o moru, peru sí se vei que esti era caminu vieju de comunicación, muchu enantis de estal hecha la estación de Talavera. Que es calçá lo endica que el suelu está más upau, se hundi alos laus i se vein pieras pranas acolocás. Amás el cachu que poemus vel enos retratus s'aprecia que es del anchón dun carril i está al lau del caminu modernu.
Calçá

Detalli calçá
Las Vegas Baxas guardan muchus secretus que entovía no están enos librus d'estoria i que, desgraciámenti, por culpa del Plan Badajoz ya tampocu mos quea la conseña siquiera. Con una poca de suerti i huerça enas piernas se puei destraçal las lineas dela nuestra estoria chica mentris que mos gozamus del paisagi i dela naturaleza i la arquitetura.

domingo, agosto 04, 2013

Los andilis del'agua: El molino'l Manco

Acontinandu con el apartiju que prencipiamus el añu passau sobre la arquitetura relacioná con los cursus d'agua enas Vegas Baxas, inaguramus esti veranu esti viagi por Talavera. Ya palremus en tiempu dela rivera delos Limonetes quandu passa por Malpartía, peru esti golpi amus a remontal un poquinu la corrienti i ahilamus parriba, colandu Talavera pa descubril unu delos cincu molinus que guarda la estoria de Talavera: el molino'l Manco.
Mapa vieju dela parti del molinu. Se puei vel el canal de desvíu del'agua.
 Ya enos mapas viejus del SIGNA, junta'l caminu del'Albuera reza unu delos molinus que por entocis estava enfuncionandu. Amás puei aprecial-si el desvíu d'agua que tenían hechu aprovechandu un recuéncanu que hazi la Rivera velallí. Esti desvíu d'agua, seguramenti natural, peru puestu en canal pol ombri, hue el que aprovecharun pa hazel el molinu.
Restus del muru de ladrillu ena pesquera
 Ogañu quea la conseña d'essas obras de canalis i retenis por baxu duna espesa fusca de cañas, ucalitus i çarças. Puei vel-si renti Los Limonetes un muru de ladrillu vieju con mampostería de rollus de ríu i piera negra que hazi picu.
Detalli delos materialis
 En el'agua, torruscus de ladrillu i piera parecin vel-si en carrefilera, peru mu desperdigaus, quiciá siguiendu el sitiu dela vieja pesquera.
Restus dela pesquera ena Rivera
 Tol barrancu que ajorra está llenu de restus de muru de retención con rollus i el passu duna verea que vá a somatraspón premiti echal una guipaína alos restus, essu sí, si estais dispuestus a llenal-vus los pantalonis de repegonis i a espinal-vus conas çarças...
Pieras dela barranca
 Cona puesta d'ucalitus ena Rivera, el muru s'alevanta por cima delas raízis de tan dañinus árvulis, peru, quandu menus, retienin el bancal impidiendu que s'abarranquin más tierra i pieras pabaxu.
Retratu dela orilla andi arranca el muru
 Más al norti, a unus 300 m, está el molinu, escamuflau en una parcela. El amu, Pepín Pérez, el Molinero, que allegu cona su mugel ena becicleta al ratininu de yo, tuvu a bien esprical-mi el enfuncionamientu del molinu i dizil-mi las condicionis enas que estava de quandu aquellu era del su avuelu, don Florencio Salguero Pérez, el últimu molineru. El ombri perdió una manu que s'entalló moliendu i daí le vien el nombri de molino'l Manco.
El molino'l Manco
 El molinu es duna navi larga, hechu encima delos canalis polos que se desviava el agua ata volvel a soltá-la ala Rivera. La hechura es de ladrillu vieju a hilu con algunus elementus de lanchas en el suelu i ena parti delas compuertas. El antiguu tendría un techu a dos aguas, astilu del molino d'Isidro, peru, sigún me anduvu contandu el amu, el avuelu repusu el molinu alevantandu unu delos murus queandu el techu a un'agua formi se vei en el retratu. Enque el molinu pareça repuestu, conserva quasi que toa la estrutura precisamenti polas obras que tuvun antañu i las que hizu el amu pa adecentá-la comu navi pal tractol.
Muru sul cona parti dela entrada del'agua i las compuertas
 En el muru sul s'aprecia el passil delas compuertas, peru no la horma original, pos los cortamaris tuvun de quitá-lus al cegal los canalis.
Muela solera
Uecus ena paredi
 Ena parti dahuera puei vel-si la última delas muelas empreás ena molienda. Es la solera, sin apeninas desgasti enos canalis del piera. Pola hechura i las otras muelas d'adrentu s'aprecia que era un molinu pa ganau, no pa consumu umanu. El amu me dixu que no vidu más muelas destintas d'aquellas, polo que en no uviendu d'esmeril comu las que vesitamus en el molinu d'Aljucén, el molinu'l Mancu era pa consumu del ganau.
Techu del molinu ogañu
 Ena parti de drentu puein vel-si lo mesmu enos murus que en suelu la vieja estrutura del molinu. Se vein los uecus andi divan apoyaus los palus de sustén delas tres compuertas, tamién a tres distancias. El amu me dixu que llegó a conocel la cabria del enfuncionamientu d'adrentu pala molienda.
 La cobierta está hecha de madera con el espetu que le queó don Florenciu, queandu un espetu antiguu ala manera delas quairas i granerus delas casas de colonus.
Detalli del suelu
 El suelu, de espetu muchu más vieju, está compuestu de lanchas i muelas partías. Quea la conseña dela tercel delas muelas soleras en el suelu con claras señalis de desgastamientu i arruñamientu.
Muela encustrá nel suelu
 El muru que dal sul es que mejol conserva la parti del molinu, pos al norti está hechu un tinau pa metel aperus o veículus. Es ena parti sul andi se puei vel la seña delos antiguus propietarius o retificaoris del molinu, con firmas o manus por cima del cimentu. La que más destaca es la que reza de 1896, quandu el molinu seguía enfuncionandu.
J. G. / 1896

 Peru no es el molinu lo únicu que llama l'atención. En una casilla, seguramenti la vivienda del molineru, peru bastanti repuesta, vemus un sillal de granu que no sabemus si era de lugal o hue traíu d'alguna parti.
Sillal de granu
 En parti que da pala carretera vemus la noria vieja cona que se regava el uertu. Los Limonetis, que está hechu a cachus i se mientan polas senaras delos amus, tienin algunas norias entovía mantenías. Talavera, junta la Puebla, son los puebrus viejus que mejol án sabíu conserval las viejas norias de regal.
La noria'l Manco
 Entre olivus se conserva los poyetis andi está assujetá la noria i la propia noria con tolas sus pieças, enque el estau de desgastamientu es malu por estal al entreperiu.
Engranis d'adrentu
 Al farrungal-si unu delos laus i al tenel mal conservau el canal, la noria cedió d'unu delos laus i está mediu canteá, peru durará muchus añus más si no l'arrancan.
Detalli dela pieça cimera andi diva l'almijarra
 Del desaguaeru delas cozeras ná quea: tamién están cegaus. Mesmu ena barranca dela Rivera tampocu quea ná, desquitandu algunus rebaxis en el perfil por andi diva a paral el'agua.
La Rivera al su passu pol molinu
En el su conjuntu, es unu delos lugaris más interessantis pa entendel la estoria delos puebrus viejus i la gestión delas tierras de cultivu. Las uertas regás con noria i los molinus pal ganau se desparecierun dela nuestra estoria, pos criarun los molinus de lus i los motoris pa sacal agua. Comu estas costrucionis quearun ya inserviblis pal ombri, namás el respetu polo antiguu, el recuerdu delos viejus i la voluntá de conservación es la que premiti que estén en pie. El molinu'l Manco lo aprovecharun pa hazel una navi pal tractol i los achiperris i essu á síu lo que premitió guardal la estoria d'esti edificiu. Más o menus repuestu, peru cona su estrutura entera, poemus vel las señas dela estoria pola voluntá delos ereerus. Estu modernu que llaman reciclagi no es más que volvel a aprovechal los materialis i las estruturas que ya no cumprin cono que huerun hechus i los antiguus sabían muchu d'ellu. Vemus cortijus i conventus hechus casas roalis, caminus carreteras, casas viejas comu centrus d'entrepetación i molinus i ermitas casillas: enque duelga porque no se puei condural algu en estus estaus sin mual la fachá, pareci que es la única salida que tenemus paque poamus disfrutal dela estoria delos edificius sin tenel que acuíl ala arquiología i alos archivus monicipalis. Dendi aquí gracias a Pepín, el Molinero, por dexal-mi vel el molinu i dal-mi las espricaeras pa componel esti endilgu.