jueves, agosto 30, 2012

El barrilino

S'amontonan las pubricacionis (cosa estrordinaria!). Ayel mesmu presentarun en Montiju la revista de ferias 2012. El amigu i envestigaol Manuel García Cienfuegos s'á encargau de hazel una revista curiosa con artículus de especialistas i provincius ondi s'á destacau la coltura.

Portá la revista

Estus mesis atrás, me pidió que endilgara algún articulinu pa essa revista i que lo hiziera en estremeñu. Mu gustosu hui d'aquella propuesta, pos era la primel ves que me encargavan un endilgu en estremeñu dientru dela mesma comarca. En siendu justu con el apedimientu, m'aterminé por escreví-lu ena variedá daquí, respetandu las palabras i la prenunciación paque montijanus, poblanchinus, lobonerus, talaveranus o qualquiera delos paisanus que viera la revista i se topara con el artículu lo leyera conos ecus delas sus propias vozis i espressionis. I es que la nuestra idioma es tan rica que da pa escrevil enas variantis de ca sitiu sin descarecel la lengua común estremeña!


Primel página de El barrilino
Amás dela condición de horma, el tema tenía de sel a tentu las ferias antiguas. Comu la feria de ganau hazía muchus añus que no se celebrava, anduvi envestigandu sobre cómu eran los rodeus que sí que conocierun las generacionis de mis abuelus i tol ambienti social d'estus puebrus. Cona ayúa del propiu Manuel a tentu la desposición antigua d'El Montiju, el nombri antiguu delas callis i la relación de ganau/sitiu, amás dela assestencia delos trebajus que tengu hechus de toponimia, púi destraçal el bastiol ondi se muevin los pressonagis. Ena idea de que essas ferias eran un acontecimientu social mu sonau en aquellus tiempus, enxareté un cuentinu, con el que la genti imponel-si de cómu eran aquellas ferias sin necessiá de tenel que comental datus estóricus (ya el Manuel se encargava de descrevil de manera científica el assuntu en el artículu "La Feria y Fiestas Patronales en el contexto social de la segunda mitad del siglo XIX").

Aquí vos queu el resultau, paque lo veais dentru dela propia pubricación. Esperu que vos gusti!

lunes, agosto 27, 2012

Endilgu sobre'l sesseu talaveranu

Un endilgu aparenti pa echal-si una idea del sesseu talaveranu, hechu por Cristóbal Cansado y Antonio Gómez:

http://cronicasdetalavera.blogspot.com.es/2012/08/el-seseo-en-talavera-la-real.html

Sobre'l sesseu en esti puebru ya dedicaremus un endilgu conos datus recadaus i angunas notas d'entonación i léssicu, pos Talavera es unu delos puebrus con el estremeñu más característicu dela zona.


domingo, agosto 05, 2012

Los andilis el'agua: Rivera de Lurianilla

Las Vegas de Guadiana es el ecenariu ondi los ríus i riveras muerin. Los que vienin del norti, de San Pedru, tapocu s'escapan a essi sinu dispués de correl con caudalis escassus arremolleciendu el gargüeru de piaras de ovejas i vacas que pastan enas dehesas, quandu las charcas i lagunas s'ensecan colas caloris.

Dendi la Sierra'l Vidriu i de Luriana, entre La Roca i el Zánganu vien vertiendu las sus aguas la rivera de Lurianilla, atravessandu fincas importantis comu la de Morantis, La Enzinosa o El Cinchu. Naci ena Sierra'l Vidriu i un pocu más embaxu cobra huerça ena horca con dos regatus ena portilla que ai entre sierras, assolapau alos murus del conventu vieju al que le da nombri. D'aquellas tierras bravías i rúsperas ajorra pastueñu regandu cortijus i dehesas, atravessandu la carretera La Roca, ondi en el sitiu de Morantis los endicaoris la llaman La Muela.

Rivera de Lurianilla
Lurianilla con un canal de regueríu
 Sigún vá buscandu Guadiana entre lombus gordus i chicus se vá llenandu de vegetación de ribera, tantu, algunas vezis, que es compricau vel póndi passa el'agua. Quandu llega pa El Acheí, cría una vega verdi entre cerrus i que los inginierus aprovecharun pa passal por aí el Canal de Montiju. Qualquiera que vesiti essa zona vedrá las retortuñas que hazi el caminu'l canal, diendu pal norti primeru i dispués pa ponienti, bordeandu tolos cerrus de Cabeça-Ruvia. 
 La hechura del canal has que la rivera quei arroeá en un buen cachu pol propiu canal que se encorva en ella. El resultau es una vega entre cerrus (los de El Cinchu i Cabeça-Ruvia) cerrá por agua menus por abaxu i atravessá en tó el su largol pola rivera. Comu es propiu d'estus puebrus, ain caseríu desperdigau en essi braçu de tierra con casas aislás assentás a renti Lurianilla.
Vega de Lurianilla
Forrajalis
 Los campus acotaus pol canal se gastan comu forrajalis, uviendu mucha alfalfa, peru tamién maís i alguna que otra senara con arrós. Más pal sul, prencipian las parcelas con frutalis. La vega, enantis del canaleu i la presa de Morantis, tuvu que sel tierra que s'alagara a ca ná, sigún se vé ena hondura del terrenu i la cantiá de caminu que antañu passavan por aquí.

Cortiju de Cabeça-Ruvia  d'Abaxu
 Por un caminu que oi no lleva a parti denguna se llegava al cortiju de Cabeça-Ruvia. Essi caminu namás sigui oi pola parti del cortiju, porque sigún s'adientra ena vega, se corta por Lurianilla: ondi antañu avía un vau, oi la fusca no dexal destinguil ná.
Dehesa de Cabeça-Ruvia
 La dehesa de Cabeça-Ruvia cogi la tierra que se destiendi entre Guerreru i Lurianilla, aprovechandu los lombus de enzinal i charquinas pal ganau. Tien varius cortijus dendi el norti ata lindal con El Pesqueru. Esta dehesa ya es términu de Badajó, peru la vega d'abaxu preteneci alos sartenejerus. 
Vaquilla a bebel
 La propia canal está de lindi entre la dehesa i la vega: dela isquierda pa drentu es regueríu dela derecha pa huera es dehesa. Siguiendu el cursu el'agua, se llega ala carretera d'El Acheí, más ancha i mejol aviá. Sin perdel el passu dela rivera de vista, amus a salienti pa vel la boca de Lurianilla.
Lurianilla buscandu L'Alcaçaba
 La rivera mueri entre arrozalis, a pocus metrus dela carretera, peru no da la su agua entovía a Guadiana. Lurianilla mueri en L'Alcaçaba, ena tierra de Las Torris, más essatamenti entre Torre-Baxa i Torre-Alta.
Boca de Lurianilla
 Allí los juncus, chopus i çarças apenas dexan abrigual óndi es que passa L'Alcaçaba pa acogel las aguas santiguás de Lurianilla.
Depósitu de Torre-Alta

Siguiendu el cauzi de L'Alcaçaba volvemus pa casa, dispués de vel otra delas riveras que riegan los campus delos que comemus. La rivera de Lurianilla, larga i con agua desigual, mos acuerda un nombri romanu, algún señoritu de fincas, un tal Laurianus, que tenía alguna villa ondi dispués hue un lugal, alogu un conventu i otra ves un cortiju, largu d'aquí, ondi la tierra tien otru colol i el suelu s'arremanga pa hazel cerrus, portillas i solaperas.