sábado, junio 30, 2012

El caminu La Estación

Antañu las maneras que avían de dil dun sitiu a otru eran más cenzillas i sufrías que agora. Quilometrus de caminus que eran cruzaus por carrus, bestias, ganau i pressonas i atravessavan hoyancus, vegas, cañás i quebrás i alas vezis, ríus. Los más viejus aquí s'acuerdan delas ampias balsas i barcas que avían pa cruzal Guadiana, pa ajuntal unas fincas con otras, unus puebrus con otrus. El ríu Guadiana no era un sitiu que se puiera achancal assín comu assín, pos apeninas avían vaus con passileras i los que avían en tiempu metíu d'agua eran mu perigrosus.

Quandu echarun las vías de tren por esti valli, los prencipalis puebrus tenían su apeaeru o una estación. La d'El Montiju era la más soná, peru tamién avía una estación en Talavera... peru a más de 8 quilometrus. 


Guadiana junta'l caminu La Estación
 Pa llegal a ella, los talaveranus tenían de passal Los Olivares ata llegal al ríu: allí tenían de cruzal Guadiana pola parti ondi está agora El Badén, enque alas vezis tenían que dil-si bastanti más largu por mé dela huerça'l agua. Dispués, al norti, tenían que passal por L'Alcaçaba cogiendu La Calçá ata afrental-si la vía.


Casilla
 Ogañu, el vieju caminu sirvi pa llegal alas parcelas, ala depuraora o algún que otru cortiju. Con el regueríu á perdíu parti del su destraci original, sobre tó en el tramu entre Guadiana i L'Alcaçaba, enque por suerti se conserva la parti más apreciá, que es el cachu que corri en vera'l ríu. 
Endicaoris
 Amás está catalogau comu una delas vías naturalis de Guadiana i está ata asseñalau con endicaoris ata la parti de Torre-Chica

La Puenti de Torre-Chica
 Entre tupíus maizalis i bosquis de frutalis corri entre bayonis un braçu importanti de Guadiana, de bastanti anchón alo primeru ata moril un pocu más alantri en Sarteneja. Que esti braçu uvu de correl con bastanti agua lo muestra una puenti inculta en Torre-Chica, de hechura moderna, peru rezia, pocu transitau.

Caminu i braçu
Esti tramu que recorri dendi El Badén ata Torre-Chica, pol veregel de árvulis de ribera comu lloronis, ucalitus o higueras i frutalis i maís, cola postura, es una vía pa embaíl-si con el chiribeu de qualquiera páxaru a precural la queá o el remurmulleu del agua frujiendu en baxu.



domingo, junio 24, 2012

Los andilis el'agua: pozus i norias (1a parti)

Los que mos criemus en el regueríu, en un valli cruzau por canalis i cequias, colos sifonis guardandu los cruzis, con arcus forraus de cementu ensomandu-si enas hondonás, con motoris, grillus i pibus a regal día i nochi no entendemus cómu se poía vivil enantis dela tierra sin essas tecnologías.

Echandu la vista patrás, quandu los cultivus estavan enas güertas i lo demás era dehesa, olival o forrajal mos paeci que Las Vegas Baxas era un sitiu secu, cola tierra agrietá i ensequiná pol sol machucón delos veranus. Peru quandu unu s'adientra enos campus i en xaramagalis, en lexíus, en rinconás o en metá delas parcelas afrorecin costrucionis de ladrillu, albordas de granitu, carruchas viejas, pilonis i pilas, albercas, bocas de pozus, prencipia a entendel el ingeniu delos nuestrus agüelus pa precural el'agua.

Amus a echal un passeínu polas rutas del agua enantis delos regueríus, enantis delos puebrus nuevus, porque vá a merecel la pena comprendel cómu antañu estava el agua andiquiera sin precisal de hazel grandis obras i lo mesmu pal abatecimientu umanu comu pa regal, los antiguus vezinus delas nuestras vegas sabían aprovechal de manera assensibli i derecha los recursus ídricus delas sus tierras.

Pa encetal esti andil ei elegíu dos costrucionis que no están largu de La Puebla.


Alborda'l pozu
La primera d'ellas es un pozu que se halla junta La Cabrilla, ena pescola duna senara, en el rincón que hazi con el caminu La Zorra. Es de alborda ancha i hechu con ladrillu, con mu pocu hondón. 


Interiol de ladrillu
Una delas características delos pozus antiguus paquí era la su poca hondura, pos quasi que a frol de suelu abarbava el'agua, lo que provocava que en iviernu, quandu llovía, muchas vezis el'agua reballara. La capa freática en esti valli es mu riquíssima, tuviendu mucha mayol cantidá d'agua por baxu los pies que en viendu-la correl por regatus i riveras.


Pozu de charrúa
 No mu largu, sin perdel de vista o quasi qué La Cabrilla, al sul de Santu Toribiu, junta la antigua parti Los Hoyancus, en un destensu lexíu se vein dos costrucionis sobressalientis del yervazal: un pozu de noria (nora o charrúa, que tós tres nombris tien) i una especii d'albercón unus metrus a salienti. 



Dendi La Calçá, siendu un pocu mirau, se puei vel amenazau pola costrución urbanística por tres delos sus laus. 
Los pozus con noria son más comprexus, prencipiandu pola su horma inregulal. Ala contra que los pozus tradicionalis de carrucha, estus son quairaus o rectangularis, con varius apartamientus i pilas al reol. Están mu elevaus, pa facilital la movición la máquina -que se hazía por mé de cavallería o burru que diva diendu vueltas pol andel cogíu pola mairina o almijarra- i la caía el'agua.


Sitiu andi diva cogía la noria
Esti pozu gasta dos apartamientus rectangularis i una pileta por cima dun pozu con muchu anchón. Está to hechu de ladrillu. Dela noria, namás quea la conseña de bel estau allí enganchá.


Murus
Al lau, desapartá por una vereína alevantá, ai una especii de albercón quadrangulal de ladrillu sin luzil. Ca una delas sus caras apunta pa un puntu cardinal de manera milimétrica.

El conjuntu es duna belleza propia dela su funcionalidá, bastanti bien conservau, con muy buena situación, tantu pal su acessu comu pala destración d'agua: essus suelus antiguamenti estavan llenus de charcas que manavan agua, que llaman los viejus del lugal Los Hoyancus. Tristimenti, agora es un lexíu arroeau de casas. Enos 90 hizun la calli Mérida (una delas más cortas dela zona) al atrás dela calli Faldiquera i ai pocu añus, cona pómpora imobilaria, por da-li un nombri duci en estremeñu, la parti de Santu Toribiu (antiguas güertas al sul de La Cabrilla), parti ondi antañu avía una ermita mu nombrá dela que no quea más que la referencia en decumentus de ai muchus sigrus, ora son casonas grandis con andal i nombris de prantas. Las obras se detuvun a escassus 80 metrus del pozu, polo que vemus que está en perigru. Comu el ayuntamientu decida derrotal esti pozu el día de mañana, arramplará colo pocu antiguu que le quea al puebru i que es tou un símbolu dela horma de vida delos nuestrus agüelus, que no tenemus de olvial, ni tapocu atierral.

lunes, junio 04, 2012

Villa romana d'El Pesquero

Ayel tardi hui a vesital el yacimientu duna villa que mu pocus conocin i los que lo hazin es polos mosaicus que d'allí se sacarun. Quandu unu vá alos museus i lei los rétulus, si son fielis, endican la procedencia delas pieças, otras namás las descrivin o ponin la fecha. Alas vezis apaecin topónimus comu Las Tiendas, Torre-Águila, El Quartillo o mesmu El Pesquero i naidi sabin óndi están ni qué son. Pues muchas vezis son cortijus, otras son fincas, otras paragis que no están mu largu, más, muchus están aquí, entre las parcelas, arremetíus entre senaras, ensomás alas canalis o visteandu dendi algún cerrinu.

Esti es el casu d'El Pesquero, finca antañu destensíssima que cogía dendi Novelda ata  la rivera de L'Alcaçaba, grandi parti al norti dela vía i pabaxu ata metel-si en Guadiana, cogiendu varius charcus. De juru que'l nombri le vien pol alguna presa hecha colas aguas que abocavan con el arroyu Guerreru, que la atraviessa, o mesmu ena caxa del mesmu: la custión está pendienti de envestigal. Sea comu sea, el sitiu es unu delos más previlegiaus eno tocanti al gastu agropecuariu, cosa que ya supun vel los nuestrus antiguus paisanus delos tiempus romanus i visigodus. Amás, lo mesmu que agora, el sitiu estava mu bien comunicau, pos lo cruzava a apenas un quilometru del ríu la calçá que diva ata Emerita.

La zona guarda testimoñus de assentamientus, villas i mansiones a hinchaol. Por mental los más importantis:
  • Torre-Baxa, que es una finca i un cortiju con secaerus en el términu de Pueblu-Nuevu en el que hallarun varias lápidas de tiempus visigodus, una delas qualis tien un lindu salmu en onol a Pascenciu con algunas particularidais dialectalis.
  • Plagiaria, con topónimu latinu conservau, se trata duna mansio, a especii de venta (moernus motelis de carretera), ena finca de Las Bardocas, tamién junta Novelda.
  • El Pesquero, villa romana i visigoda, no mu largu de Torre-Baxa i dela que vos vo a palral un poquinu velaquí.

Entrá al yacimientu
 Esta villa está escavá parcialmenti, por no dizil que somerinamenti. Se halla en un cerru renti a Guadiana, entre un maizal i una vaquería, al sul-oesti de Pueblu-Nuevu. De hechu, el yacimientu tien por nombri "El Cerro", porque vistu dendi largu se vei comu una lomba.
Las primeras i quasi que únicas escavacionis se hizun pa metá delos 80. Pa finalis dela década ain artículus a descrevil el yacimientu. Estas escavacionis sacarun parti dela residencia (pars urbana) del conjuntu: lo que ogañu puei aprecial-si son parti delas termas, algunus cubicula i patius.
Pa entral al sitiu ai que echal maginación i siguil los lombus las senaras. Ala entrá, se passa un desagüi en el que ya se prencipian a vel las pieras grandis esparramás entre la fusca.

De frenti se halla un pozu cegau dunus tres metrus de hondón que, sin estal asseñalau i por estal meyu tapau polos tronconis los ucalitus i la fusca es verdaeramenti un perigru.
Liençu de paré
En saliendu d'algunas obras de canalización i saltandu velaí el cachu'l pozu se vei, en una plaera que costitúi la cimera'l cerru que s'aprecia dendi lo desviau, la conseña la villa, desenterrá a cachus.

Alo primeru se vein liençus de muru comu dun correol. La hechura los murus que sobressalin del xaramagal se vei que tien de basi los propius rollus de Guadiana i ladrillus coloraus arrebrujaus. En algunus cachus se puein vel las destintas capas delos mesmus.
Cubicula
 Al términu del pasillu, se vein algunus cillerus con destintu altol, aterraus quasiqué i un patiu grandi. Algunus cubicula meyu enroaus. Por baxu d'algunas d'estas salas se sacarun parti delos mosaicus, los demás estarán por baxu la tierra a algunus centimetrus, cobiertus.
Detalli sala arreondeá
Se destaca más que ná una sala arreondeá ena parti norti, con pavimentu musivu embaxu i que es la lindi dondi s'acabó d'escaval. Se nota la tierra alevantá entre la vena loca i los cardus a tolos laus dela villa i el suelu güecu en algunus cachus: ni me maginu el trebaju que queará aí!

Hornichi
Ya a renti'l ríu están las termas, ondi ain varius liençus de paré con costrucionis pal agua. Pala parti de delantri, está un correol con tres hornichis ena paré. Por detrás, unu delos bañus, de cuyas parelis entovía puein vel-si los buraquinus de bel estau forrau con marmu.
Bañu
Esta parti delos bañus es el que más perigru corri, pos está junta el ríu, hiziendu una barranca compricá d'ajorral pola cantiá de raízis, regaeras i pieras caías. Dendi bien baxu s'aprecian cimientus de murus que están entovía pendientis d'escaval i cachus de paré farrungaus i caíus al ríu. Las muchas suba que á teníu Guadiana á arrastrau parti del material arquiológicu, mesmu cimientus, ata la metá del propiu ríu.
Detalli hechura muru
Está polo craru que quandu hizun la villa, Guadiana no passava por aquí, sino pol charcu de Mataquinteros, en Los Novilleros i Malpartía, ogañu al norti de Balboa. Con el tiempu, la corrienti prencipal muaría la caxa pa algún braçu del norti, ondi el terrenu s'abaxa, ata enanchal-si rentinu la villa.
Guadiana con cachus de paré arrastrau pola corrienti

El estau d'esti yacimientu es lamentabli. Hechas las catas i parti desenterrá, al cabu de venti añus sin escavacionis serias, la villa está echá a perdel. Colas aguas los reguedíus que arrastran los materialis pal ríu, la huerça la propia Guadiana, la alamea d'ucalitus que colas raízis alevantan los cimientus i el pavimentu i las sus ojas incultan las parelis, sin un mantenimientu básicu, la villa está abocá al olvíu comu restu material i estóricu del nuestru passau. Dendi aquí hagu un llamamientu al Goviernu i las autoridais competentis que pongan en valol el conjuntu arquiológicu i sigan a escaval i a envestigal, lo mesmu que hizun con Torre-Águila. Esti tesoru, delos más incultus de Las Vegas Baxas, sigui inoranti delas gentis, delos muchachus enas escuelas i aborrau delos librus estoria. Namás los que hizun las catas, algunus arquiólogus i científicus sabin d'él i puein assegural algu sobre el su possessor i la su estoria i quandu lo hazin, se quea en el ámbitu las revistas científicas, sin repercussión nenguna entre'l púbricu. Envertil en estoria i divulgación, es envertil en el huturu dela zona, pues movel nuevus sectoris entre los nuestrus puebrus impidirá que la genti nueva tenga d'ahuyil.

sábado, junio 02, 2012

Festival Romano de Barbaño 2012

La calol assolanava las frutas mentris que'l cochi me llevava pola carretera Barbañu (antiguu caminu Barbañu) ata la entrá. Ala gocha se destendían las largas navis del cortiju de Torre-Águila, que no en baldi el su nombri sedría protagonista esta tardi, peru no pol cortiju, sino pol yacimientu arquiológicu que ena dehesa (ogañu parcelas de reguedíu) omónima se halla: la villa romana de Torre-Águila.

Calli de La Virgin a aderezal-si pal Festival
Barbañu es pedanía de Montiju i s'entanga entre las dehesas que antañu se conocían pola de Barbaño i la de Torre-Águila. La su costrución vinu con el Pran Badajós, desacreditandu-si delos consejus que poblanchinus i montijanus hazían a tentu la parti en oi s'alevanta, por sel sitiu freqüenti de alagamientu quandu Guadiana se sal dela caxa (passa renti del puebru, juntu algunus charcus i la Cañá Honda). 

Esta tierra estuvu mu empobrá dendi los romanus, quienis alevantarun una villa enormi, al sul de Guadiana, cerca delas calçás que divan pa Emerita. Quandu los visigodus, la villa hue un importanti centru pobracional con más de cincu cientus de pressonas que trebajavan con el olivu i las parras i aprovechavan la vegetación de ribera pal ganau. Junta la basílica de Santa Olalla, a escassus dos quilometrus al norti, la de Torre-Águila uvu de sel de cierta importancia púbrica i privá. Cola conquista mora, el lugal se despobró abondu ata continual en el tiempu comu dehesa. 

La virgin de Barbañu, encontrá tamién junta'l yacimientu, da nombri al prencipal santuariu delos puebrus centralis de Las Vegas Baxas: la ermita de Ntra. Señora de Barbaño. Á síu i sigui siendu protagonista de jiras i hue a caberus del sigru XIX nucliu religiosu enas ferias de ganau montijanas. Ogañu, arriba'l puebru, sigui la ermita seculal acovijandu ala virgin i siendu puntu de salía i de entrá a Barbañu, pos dendi'l su sitiu corri la calli que atraviessa el lugal. En estus días se halla cobierta de paja: es el caminu pol que se celebra esti fin-de-semana el Festival Romano de Barbaño.


El alcaldi Barbañu a inagural las chalras


Por mé del Ayuntamientu i el eshuerçu de arquiólogus i estoriaoris púu ponel-si ai unus añinus siquiera en valol el yacimientu de Torre-Águila, junta'l Charcu Las Casitas, ata entocis propiedá privá. Las primeras escavacionis de metá delos 80 sacarun parti delo que costituían las termas, junta la carretera que saliendu dela puenti de Lobón ahila pa Barbañu. Quasi que dendi entocis, el arau o el barbechu o los xaramagalis án incultau la villa sin precupación demasiá por parti delas estitucionis pa poné-lu en valol. Por suerti i pola eniciativa del propiu Ayuntamientu Barbañu i diversus pogramas púun retomal-si las escavacionis, sacandu ala lus una villa que en verdá eran varias, con tolas sus dependencias i cuyu reportagi vos pusi aquí ai unus mesis.
Miriam i José Manuel
 Ayel las jornás que tenía de bastiol el Festival Romano querían divulgal el trebaju de escuelas-tallel, Ayuntamientu, estoriaoris, debujantis, etc. án hechu en tous estus mesis de recuperación i puesta en valol del yacimientu. El alcaldi, Juan Manuel Ambrona, antiguu compañeru de fatigas, estudius, ánimus i desánimus en el estitutu La Puebla, dio la bienvenía i abrió las jornás. El pograma se tracamundeó pola assencia de dos delos ponentis, enque púu encarrehilal-si sin pobremas. La primel ponencia la dio Miriam, trebajaora enas escavacionis, que palrandu en nombri de Germán Rodríguez, el diretol delas mesmas, dio endilguis mu valiosus a tentu la esperencia que costitúi revelal la estoria por mé delas herramientas i procedimientus arquiológicus. Anduvu palrandu a tentu los destintus passus que llevarun i cómu huerun sacandu materialis i dependencias delas villa romana i visigoda. Dio datus curiosus comu los enterramientus, que en epoca tardía se hazían en el peristilu dela villa vieja, estuviendu las tumbas techás con tejas i muchus delos cuerpus con una concha dela que entovía se sabi el motivu.

Aluspués, el debujanti guaxireñu José Manuel Jerez anduvu hiziendu un recorríu sobre la su vida comu debujanti i especialmenti enos trebajus divulgativus i científicus comu debujanti arquiológicu. Ena sala se muestrava una esposición con algunus delos sus debujus, retratus fielis delas pieças que desperdigás en varius museus se hallan. Amás enseñó unus quantus delos debujus delas pieças encontrás en Torre-Águila.

Regalu de José Manuel Jerez al ayuntamientu
Pa arrematal las chalras, el diretol del MNAR, José María Álvarez, echó una palabrinas a tentu la valoración del yacimientu i dela huerça que á de tenel pa Las Vegas Baxas. Amás arreparó que pola cercanía cola autovía era un buen sitiu pa sel conocíu pol turismu que vesita la comarca i que era precisu de asseñalá-lu enos endicaoris dela propia autovía. 


Estalachis dela praça
Apenas que acabó, se procedió ala entriega de reconocimientus alos ponentis i ala associación Amnis Callis, organizaora'l festival. Tamién José Manuel regaló unu delos sus debujus, una pieça bien curiosa hallá en el lugal que se trata dela boca duna reguera o huenti a manera de máscara. El Alcaldi dixu de poné-lu en el ayuntamientu.


INDAGATIO
Dispués que se clausurarun las chalras, ponentis i assestentis dierun un garbeu pol mercaíllu romanu. Los estalachis se esparramavan pola calli que ajorra ala praça i ena propia praça. Rétulus comu INDAGATIO o de oficius romanus comu CALCARIVS o SARCITRIX endicavan el tema'l estaribel.


.
Decoración ayuntamientu
En el çaguán el ayuntamientu avía unus panelis con retrataúras delas pieças encontrás ena villa: jarrus, vasijas, hevillas, ídolus, moneas, lucernas... Toa una muestra dela vida privá delos abitantis que passarun pola villa ai más de catorzi sigrus.


Esposición fotográfica


Con esta eniciativa se da un empuxoninu no ala villa namás, sinu al puebru de Barbañu i ala comarca natural de Las Vegas Baxas. Esti es unu delos tesorus que duermin enas riberas de Guadiana. Otrus siguin a dormil embaxu de parcelas o arremetíus ena alamea o dientru de cortijus i que, de salil ala lus i conocel-si podrían hazel d'esti cachu de Guadiana el centru de estudiu, divulgación i turismu dela vida romana, visigoda i árabi que estava pendienti de Méria i Badajós. Restus d'aquellas gentis se destiendin andiquiera entre Méria i Badajós, peru la mala almenistración i esplotación de recursus que de siempri á caracterizau a Estremaúra á preferíu la inorancia dela su estoria i el silenciu ala conocencia i divulgación. Por suerti quean genti comprometía pola estoria i que sabi vel huturu nel passau: filólogus, arquiólogus i estoriaoris sabin vel en tó esti patrimoñu una huenti estórica de recursus que le dan ala zona un vencijón importanti. Es precisu que'l Goviernu i l'Almenistración los oyan quandu hablan paque joyas comu las de Torre-Águila abarbin delos suelus i hagan pulal alas gentis que vivin enos puebrus.