lunes, marzo 26, 2012

Retahila 26-03-12


barateo. m ac. de comportarse como un arrabalero.
caneco. m fig hombre bruto.
chiringá.  f necedad, sandez, payasada que se dice.
coco-de-lu. m ENT luciérnaga (|| Trigloporus lastovitza, insecto lampírico).
compricao, -a.  adj (dicho de algo) complicado.
despolvà. act desempolvar. Despuelvo el quarto.
duré.  f dureza.
encima. adv indica superioridad. pl noc 1 de segundo plato. Pa comè encima ai natillas
enmobiliaria. f inmobiliaria.
ensecticida. m insecticida.
enseñao, -á. adj (dicho de alguien) acostumbrado, hecho.
ensuavecè. act ponerse suave. 2 (dicho de alguien) suavizar su ánimo y palabras.
entremediario. m intermediario.
entrevenì. act intervenir.
enxambre. m multitud de insectos. Enxambre de hormigas. Enxambre de cocos. 2 gentío, mogollón de personas.
espabilación. f ac. de espabilar. 2 ef. de espabilar. 3 pl espabiladeras.
espasmo. m ac. de espasmá-se. 2 ef. de espasmá-se. 3 cosa o persona pasmada. 4 MED espasmo nervioso.
espesso, -a. adj (dicho de alguien) sucio. 
governà. act manejar, administrar. Governà las perras. 2 preparar, disponer, arreglar, montar. 3 med manejarse, administrarse.
hilaera. f ac. de seguir la línea de algo. No ai que torcé-se, ai que dì pola hilaera.
incucà. act inculcar, infundir. M’incucó lo de tenè que adenunciá-los.
mariquitiña. f muñeco recortable que se viste con ropas también recortables de papel.
marisselva. f BOT (|| Lonicera caprifolium, planta caprifoliácea).
místico, -a. adj (dicho de alguien) melindroso, serio, antipático.
moneà. act presumir, darse importancia.
monería. f gesto gracioso o ridículo.
muerdisco. m mordisco.
pachochá.  f patochada, necedad, sandez.
pachocheà. act decir sandeces.
paleta. f ANAT pala (|| diente incisivo).
pergaño. m peldaño de una escalera.
puerta. f fachada de una casa. Embarrà la puerta.
ranal. m sitio poblado de ranas.
tamboreà. act tocar el tambor o el tamboril.
tamborista. com tamborilero. 

jueves, marzo 22, 2012

Festival folklórico Valdelacalzada en flor (vidius)

En un anteriol endilgu vos pusi un reportagi fotográficu. Agora vos traigu los vidius d'essu días. La cámara la pusun los tamborilerus, que era de la su associación. Las grabacionis son hechas entre unus i otrus: delas callis i de los grupus a bailal son d'ellus, mentris que quandu están ellus a tocal los grabu yo.


Lo mejol es el passacallis pola calli La Puebla, Ronda Salienti i Calli la Luna, andi poeis vél mejol la decoración las callis i el ambienti que avía.

Limpia'l molinu (Fasi IV)

Ayel hui cola morralina otra ves pal molinu a echal un ratu ena poa i descuaji de çarças. Enque hazía airi, la tardi estava calorosa. Los frutalis la huerça d'ellus ya án perdíu la frol i están echandu ojas. Namás quean los más tardíus, enque ya plontu prencipiarán a afrorecel los peralis.

El trebaju d'oi era siguil limpiandu i enanchandu la entrá al molinu a l'altura el muru que se destiendi por frenti'l molinu. Esta ves cogí la parti derecha del muru i partiendu dela esquina que ya tenía desenterrá limpié de çarças el lau del muru sobre'l metru i mediu.

Muru derechu enantis de limpial
Mesmu muru dispués de limpial



















La faena no hue mu enliosa porque en essa parti estava el çarçal más craru i avían pocas matas que salían daí. Lo compricau hue endispués arremangá-las i haciná-las patrás, en no tuviendu una horquilla ni pala ni achiperri dengunu más que palus secus.


Parti derecha del muru
Parti derecha dispués de quital las çarças i desenterral
 La segunda parti'l trabaju diva a sel prencipial a delimital el anchón del muru. Con una paletina hui desquitandu el tomu de 15-20 cm que tenía por cima ena parti la esquina. Formi diva escavandu nel güecu la puerta, di con más ladrillus i una lancha de piera a unus 35-40 cm más patrás del muru. Me sospechu que sea el primel escalahansu i que'l acessu al molinu tuviera anguna serii de escalonis pa salval el desnivel que se vei enos retratus.

Entrá del muru ena fasi III

Primel peldañu
 Me llamó l'atención que por cima del primel peldañu uviera un otru ladrillu en forma de embúu achicandu la puerta. Comu es muchu el tomu de tierra i no tenía ayúa pa arretirá-la, dexé la escavación en essi andal ata otru viagi, pos las raízis las çarças están bien agarrás i alos laus entovía tengu limpiu el suelu, siendu faci encraval-si los dientis las ramas poás.

Entrá dendi dientru'l molinu
Dispués que eché dos oras de limpia, agarré i midí el molinu con una vara i a quartas i hizi un debujinu dela pranta'l molinu. Quizá que vos intessi sabel que'l molinu midi unus 13,20 m de largol por 5,50 d'anchón. Tien  dos muelas baxeras de 1,20 m i seguramenti esté la cimera dela primel d'ellas enterrá endentru. Tien tres vanus que hazin ventana: una al hondón, otra de guía por cima la segunda muela i otra ala entrá, siendu la más grandi i larga la dela paré del hondón. Amás ai un tragalús en el techu conservau i un hornichi nel muru'l hondón. Essi techu está assujetau por tres arcus que hadrían una bóveda de mediu puntu de ladrillu, dela que namás se conserva la parti del hondón i los arranquis dela siguienti. Los arcus están bien conservaus el del final i el segundu, estuviendu derrotau el primeru d'ellus. Ena parti de huera, ena paré de ponienti ain quatru contrafuertis. El suelu del molinu no s'atina a vél cómu es, pos ai un tomu de tierra i retejonis de barru dentre 5 a 25 cm. Por baxu los güecus las compuertas ain cachus grandis de piera entre l'agua i el barru i enque no se vein mu bien seguramenti sea granitu (la segunda muela cimera?). Tamién ayel comprové que en abaxandu del bancal pola verea que ai hecha i que ei supuestu que á de sel la original por el peaçu de muru que ai alo primeru, ain cachus de ladrillu i piera enterreaus, seguru que pertenecientis a essi liençu i que despressas están atierrás al reol.
Por más que ei buscau i arrebuscau enas pieras del molinu, ala entrá o dentru, no ei síu escapás de vél fecha denguna de costrución. En el Diccionario Madoz, de 1850, se mienta un molinu, peru ena otra orilla del que dizi: en este sitio desemboca el Guadajira y hay un molino harinero de 4 piedras, y 1/4 leg. después la rivera de Antrín. No conoçu ni tengu enteración denguna de que ena otra orilla aiga molinu dengunu en esta mesma parti de Guadiana, peru en essi dicionariu se dis que está entre los términus de Talavera i Lobón, entre los ríus que mienta, i que tien quatru pieras. No tengu tapocu denguna otra referencia decumental a tentu'l molinu i la genti del lugal tapocu lo conoci. Siguiré envestigandu.

lunes, marzo 19, 2012

Retahila 18-03-12

abusivo, -a. adj (dicho de alguien) abusón.
achisquerà. act encerrar, encarcelar.
acomparà. act comparar. No lo acomparo con ná tuyo.
acomprexá-se. med acomplejarse.
añusgamiento. m ac. de añusgá-se. 2 ef. de añusgá-se.
arqueo. m arcada, náusea.
azitúo, -a. adj (dicho de al frito) aceitoso. Roscas azitúas.
barba. f cara, desfachatez. Dezì las cosas con mucha barba.
barbeteà. act hablar con desfachatez y de manera desafiante.
botón. m BOT yema.
bracilera. f COST manga.
bulliero. m ac. cont. de bullì. 2 bullicio, ajetreo.
combarsa. f comparsa.
comprexo. m complejo psicológico.
demuestrà. act demostrar.
descrito, -a. adj (dicho de algo o de alguien) proscrito, desterrado, excluido.
descrivì. act proscribir, expulsar, excluir. Descrivió los pratos cascaos.
descruí-se. med eximirse, librarse de algo. Se descruye de hazè las cosas de casa.
dessaminación. f examen.
diurnio, -a. adj (dicho de un ser vivo) diurno.
emprecindible. adj (dicho de algo o de alguien) imprescindible.
entrevisto, -a. adj (dicho de algo) previsto, conjeturado, sospechado.
galliteà. act hablar de manera desafiante.
gravá-se. med fijarse, hincarse, quedarse en un sitio. Se gravan los coches ena puerta. El culebro se grava ena boca.
harocha. f mujer sucia y descarada, farota.
hembrista. com feminista.
hinchaporra.  f loc a ~: a porrillo.
mocho. m AGR parte opuesta de la hoja de aperos como el sacho, almocafre o la azada donde va cogido el mango.
ocupamiento. m ac. de ocupar, ocupación. 2 ef. de ocupar, ocupación. 3 empacho.
paxareo. m gran cantidad de pájaros.
queximbre. com persona quejica.
ravioso, -a. adj (dicho de una comida) picante. Están los garbanços raviosos.
recevà. act CUL echar agua al caldo de la sopa para impedir que reduzca con la cocción.
recorcoma. f ENT carcoma (|| insecto coleóptero).
reluzío, -a. adj (dicho de alguien) gordo, hermoso. El muchacho está reluzío.
requitiquismo. m MED raquitismo.
roseà. act AGR (dicho de ciertos árboles frutales) ir mostrando color rosa debido a la floración. Los nactarinos están roseando.
sinificao. m sentido, importancia. No tiene senificao nenguno.
tamborero. m tamborilero de tambor. 
telegrafo. m telégrafo.
trascornao, -á. adj (dicho de algo) oculto, extraviado.
vaziero. m ac. cont. de vaciar.
vengaroso, -a. adj (dicho de alguien) muy vengativo.

domingo, marzo 18, 2012

Festival Folklórico Valdelacalzada en flor 2012

Ayel hue un día grandi pa Val-dela-Calçá. La primavera truxu consigu, amás delos coloris i los goloris duçonis las froris los frutalis, los sonis estremeñus más auténticus. En viniendu de tós laus dela nuestra geografía, se juntarun en una mesma praça sanvicenteñus, montijanus, oliventinus, garrovillanus delas dos Garrovillas, piornalegus, salmantinus, talaveranus i valviensis.S'ajuntarun en cata delos sonis del tamboril i la frauta, dela bandurria, del alcordión, de morterus i almirecis.

Eran la media palas dozi i en La Praça sonavan los sonis charrus i estremeñus delos tamborilerus junta Los Arcus. La huenti reçumía froris i entre'l rameagi se destendían telas rosas i brancas. Los zagalis vestíus d'estremeñu s'aginavan pola su actuación i correteavan entre los mayoris. Estus, velallí, palravan en colrichis, escusseteavan los estalachis d'artesanía o estavan al tentu los tamborilerus.
Estalachis en Los Arcus
Decorau el ecenariu




Echandu retratus
Pui, cómu La Vara se rebullía tantu? Dunus añinus a esta parti, s'á veníu celebrandu el afrorecel delos arvus tamién con música. Del zumbaeru las abejas bregandu pal polin, el chillíu el'aguanievi atravessandu las senaras o el desinquietu horicheu las garças tras delos tractoris namás puein disfrutal las casas aislás, de má que se tuvu a bien trael los sonis estremeñus al puebru i festejal assín la primavera.
Ensayandu-si los grupus participantis
Pala meyudía se dio la ordin alos tamborilerus dela associación 'Santiago Béjar' de prencipial el passacallis. En siguiendu, ozenas de zagalinis en compaña delos mayoris: desfilavan Alonso de Mendoza, de La Garrovilla, Agla de Montiju, los talaveranus Luis Chamizo i ena çaga los muchachus d'Araval.

Passacallis pola calli La Luna
La ruta era corta, peru polía: desfilarun al son del tamboril i la gaita pola calli La Puebla, San Pedro, La Luna, la praçuela El Pilal i al regolvel, la calli Calçá ata La Praça. Los granitus dela huenti de la calli La Luna s'estremecierun i los naranjus, que luzían los tronconis con froris propias d'otrus arvus, s'enrosarun deque barruntarun el gentereu.

Pola calli La Luna
Dendi los balconis i las puertas, tras d'aparatus o cola vista denúa, los vareñus s'emocionarun en viendu esti políu desfili.
Las zagalinas garrovillanas de Alonso de Mendoza
Quantis que llegarun a La Praça, los tamborilerus alevantarun los sonis las sus gaitas. Las cancionis garrovillanas abrierun el festival i siguierun las montijanas de Agla. Entremediu los tamborilerus siguían gastandu dela cachera i assoprandu polas frautas notas d'otrus tiempus. Hizimus buena gavilla: me dixun que de juntal-mus un grupinu de 10-12 pa Badajó mos poían dal crassi de gaita i tamboril.

Agla
Luis Chamizo, de Talavera la Real
El grupu de Talavera luzió un hatu campusinu bien cudiau, gastandu los sombrerus i las chambras d'antañu. Siguierun los muchachinus vareñus de Araval con bailis agis i coloríus.

Araval, de Val-dela-Calçá
Dispués se para pa merendal los envitaus. Passandu las cincu, ya tardíus, se hizu otru desfili, cogiendu esti viagi La Puebla-Ronda Salienti-La Luna-Calçá ata llegal ala ilesia, en cuya puerta se acolocarun los grupus tós pa una retrataúra familial.
En entrandu en La Praça

Ala puerta la ilesia
 A media tardi prencipiarun los mayoris colas sus danças i coreografías bien ensayás. Abrierun la tardi los sanvicenteñus La Besana, seguíus delos garrotis El Escaramujo. Cuya suspresa les estuvu al púbricu en viendu al Harrampras, assustandu alos muchachinus colas sus carantoñas i gerigoncias.

El Harrampras
Dispuesinu tocarun la despedía los tamborilerus que tuvun d'aballal. La Encina los siguierun colos sus sonis oliventinus i d'otrus laus con bastanti presencia la bandurria i del colorau los tragis los bailaoris. Arrematarun unus mejoraus Araval con cancionis nuevas i bailis mu bien cordinaus. La entrá ena Federación Extremeña de Folklore la tienin bien merecía.
La Encina, d'Olivença
Músicus d'Araval
Hue un día largu i divertíu, cargau de sonis, bailis i coloris comu nunca antis á teníu esti puebru de Las Vegas Baxas. Hue un día grandi de revindicación delo autóctonu i de gozi con otrus estremeñus dela primavera valviensi. Que se luchei por esta fiesta comu Fiesta de Interés Regional está ena manu delos cientus de pressonas que án colavorau, dendi cudiandu los frutalis en el campu, decorandu callis, praças i casas con froris ata organizandu el festival d'ayel. El déssitu queó comprovau, la fama dirá corriendu a tós laus.



jueves, marzo 15, 2012

Limpia'l molinu (Fasi III)

'Essu tenían de limpiá-lu los del paru' -me dixu ayel un amigu de mi pairi al palrá-li del molinu misteriosu. Sin embargu, el ayuntamientu a naidi manda pallá a escuajal çarças i adecental una mijina siquiera aquellu, contri más a reponé-lu!

Comu vos dixi el otru día, el remediu se pon colas manus i tuviendu concencia de que, pa sanal qué, es mejol no dexal que se muera el pacienti mentris despachan rezetas.

Ayel tardi metí otra ves la estixeras i cuerdas ena morralina i ahilé a peoncia pal molinu. Pol caminu, una abeja salaína m'encravó el herreti nel pescueçu: se conoci que la espanté sin querel cona gorra en metiendu-mi polos cirgüelus.

Fachá enantis
Fachá endispués



Verea ala puerta'l molinu enantis
La mesma verea endispués
Deque llegu allí, el amu del bancal d'arriba andava a revolvel las tierras arrancandu las matas de bróquilis que quearun dela campaña. Ajorru pal molinu, sueltu los achiperris i m'enliu a echal retratus pa essu que tantu vos gusta del enantis/endispués.




 La tercel fasi era la de limpial la cara del molinu i acraral la entrá, pos sigui estandu el acessu çarçarosu. Partí la lavol en dos: lo primeru era enanchal la verea cruziandu'l muru. Pa essu era mestel poal las çarças más cimeras i dispués achorchá-las con un palu. Assina quean más vistosus los tronconis pal día que sea siguí-lus i escuajal la mata con el çachu.

Muru enantis

Muru dispués
 La segunda fasi diva a sel limpial pondi siguía el muru la supuesta cancela. Dispués de limpial por cima la verea veu que hazi esquina, de má que estava eno ciertu i por aí diva la antigua verea. De má que escavu una mijina pa vél el canchu el muru. Comu no tenía los achiperris aparentis, tuvi que dexá-lu al cabu delos 70 cm o assín de largu. Aproveché pa quital la tierra con un cubu prásticu que Guadiana truxu enas sus chorreras i arrancal tamién los regonis, apartandu las taramas i leñus puiríus que estavan atierraus.

Guadiana dendi las escaleras al molinu
Comu'l sol ayel paecía ajorral más ligeru que otrus días polas nuvis, aterminé por queal essa tercel fasi conclusa. Me quité la tierra nel ríu que tenía el caraiti que veis velaí.

Unu delos tunis pondi colava el'agua
Por baxu, el molinu tien unas entrañas entovía menus agradablis que las que las çarças atorgan ala facha. Milenta de mosquinas, leñus coquerosus i cachus de muelas i otras pieras del molinu abitan en tunis de ladrillu roxu. De momentu el acessu es impossibli por mé dela cantiá d'ucalitus, taramas i potroneras que ain.


Frutalis junta Val-dela-Calçá

Pa no dil-mus con essa imagin, vos queu con esta otra más polía al orihoscu sigún diva aportandu. Enque quearun muchus arañonis i anguna que otra hería ena oreja, en volviendu al puebru entre'l perhumi duçón delas froris i viendu la postura, caldeau el cuerpu pola caminata i la limpia, el coraçón diva conformi con el día, supiendu que no hue en baldi.







lunes, marzo 12, 2012

Limpia'l molinu (Fasis I i II)

En viendu que'l acessu derechu al molinu harineru de Val-dela-Calçá sigui entovía cerrau polos çarçalis, m'enliau a limpiá-lu un quantu-quantu. 

Ya vos palré d'esti molinu ai unus mesinus i el reol que avía que echal ata llegal a él sin queal-si engarranchau o perdel anguna pierna en baxu el barru.

Ei vistu que ain otras dos vereas que van más derechas, sin necessiá de tanta retortuña. Una d'ellas es la que gastan los pescaoris i vá derecha ala parti de salienti del molinu, ondi s'enhalla la pesquera. L'otra es la verea original, que es la antigua i que vá derecha andi está el molinu. Esta última es la que ei aterminau limpial.
Entrá caminu'l molinu
En baxandu el bancal por un cibrantu no mu en prunu i colos pisalis hechus se llega a una calva chiquina. Ala mesma entrá está la conseña dun murinu de ladrillu del que ná sé.

Vistas del molinu dendi la calva
Çarças en el momentu la limpia
Entrá al molinu
Ai que andal mu aguzau de vista pa atinal con el molinu, pos está totalmenti incultu pola fusca. En estuviendu las çarças mediu secas ogañu es capás de ábati vél-si el muru de ponienti i cachinu del techu.

Ala gocha, ena mesa calva, entri ucalitus nuevus tuerci la verea que da al molinu.

Esta entrá va derechamenti ala puerta'l molinu, orientá al norti. No averán más de 4 o 5 metrus, peru ogañu estava toa ençarçalá de má que ni la fachá se poía vél polo cerrau que estava sigún s'alvierti enos retratus.


Cimientus paré
Ena curvina que has la verea, justu andi ai un desnivel, al renti del suelu se vein los cimientus d'otra paré, quizá más rezienti i que puea sel d'anguna engarilla. 

La primel fasi de limpia consestía en limpial toa essa verea. La dividí en dos cachus: enantis i endispués del desnivel. La primel parti, que diva dendi la calva ata la curva estava más crara, pos tenel pocas çarças nacientis dientru la mesma vera i sel la huerça dellas recolgantis. La segunda parti era la más compricá ata llegal ala puerta. Está cuajaíta de çarças. No dessageru quandu digu que avía más de 2,50 m de çarçalis enreaus colas ramas los ucalitus i no se poía vél ni el sol. 

Segundu tramu dispués de poal
Namás limpial i hazel un passaízu entre las çarças era capás de vél-si la fachá i alguinu dela puerta. La primel fasi era poel acedel al molinu dela manera más derecha sigún el andil original: lo qual se concedió.

Fachá enantis dela limpia
Fachá dispués de poal


















La segunda fasi era limpial quandu menus la fachá i el lau de ponienti. Pa llegal al lau de ponienti era mestel poal la metá derecha la fachá que tamién estava cerrá de çarças i potroneras d'ucalitus.

Tamién dividí el trebaju en dos cachus: el correspondienti ala fachá i el correspondienti al lau. La parti la fachá estava no mu cerrá, enque por sel çarças nuevas s'engarranchavan más. Comu no tenía çachu, no púi descuajal más que las çarças nuevas i las que tenían menus raís.
Lau de ponienti
Paré de ponienti














La parti'l lau estava menus cerrá de çarças peru con abondancia de tronconis secus i taramas que era mestel desapartal pa poel passal. Cuya suspresa m'estuvu en viendu los arquinus pondi salía el'agua, unu descobiertu, unu pola metá i otru enterrau o quasiqué. Esti lau era el únicu que no poía vél-si por no tenel passu i estal incultu entre los tronconis. Ni dendi l'orilla d'enfrenti era capás de vél-si. Assinque una alegría m'entró en viendu aquel muru tantu tiempu desapartau dela vista los ombris.


El arcu primeru quasi enterrau
Esti patrimoñu á de estal ala vista, que lo gozin los valviensis i qualquiera turista que venga, antigual de estal aí aburríu i derrotandu-si. Peru comu pa estu comu pa otras cosas si no es por eniciativa pressonal, naidi muevi un deu pa rescatal la coltura.

Lamentabli

Paeci mentira, peru assina quearun los votus delos guadianerus: 317 a favol de Guadiana y 495 a favol de Guadiana del Caudillo. Los otrus quasi dos millaris de vezinus con derechu a votu s'astuvun. La genti nueva, polo que m'án dichu, no divan a votal o divan a dil poquinus.


Lamentabli espetáculu duna concencia que trebuta i onra al assessinu debujau de bienhechol. Los motivus, dizin angunus, que es porque "el Caudillo" no arrecuerda a Franco i que assina se respeta la estoria los puebrus nuevus (!). No entiendu qué le passa al mundu.


Por muchus apellíus franquistas que le pongan al puebru, pa mí i pa tantus milis d'abitantis de Las Vegas Baxas, Guadiana siguirá siendu Guadiana palos restus. Essa es la única tradición que conoçu i que respetu: la dela genti llamal alas cosas pol su nombri. Lo de ayel hue un desatinu políticu más añidíu ala retahila que parió otru mayol dela "democracia". Un insultu palos guadianerus, palos estremeñus i pala propia estoria.

  Los vecinos deciden en votación que Guadiana siga siendo 'Del Caudillo' ( El Periódico Extremadura - 12/03/2012 )

viernes, marzo 09, 2012

Valdelcalzada en flor 2012

L'afroración sigui una carrera ligera en día en día. Las primeras variedais de cirgüelus i malacotonerus ya están a perdel los pétalus i a echal ojas. Los almendrus más tardíus siguin luziendu la frol junta caminus i desagüis. 
Frol delos almendrus de pa La Era'l Cascajal

Entrá ala calli La Luna

Ventana la Casa de Coltura

Polin los cirgüelus dela senara de Abrán
Los polin son los que más lindus se vein, sobresalientis ena mari branca de froris, agurandu al cielu las sus ramas unus i otrus, achaparraínus, tapandu los surcus hiziendu passillus. Namás el zumbaeru las abejas, hazendosas en mesteris de çugamientu, alviertin al caminanti de que vá por buena verea.

Ramilletis de froris. Arriba, el polin ya con ojinas 
Los polin son, sigún las variedais, los primerus en afrorecel, de má que tamién son los primerus en echal la oja. La vista s'esparigi en viendu por cima verdi i por baxu brancu.

Frol del malacotoneru
Nactarinus?

Los malacotonerus i nactarinus echan unas frorinas rosas, con colol frangüesa por dientru i colos estambris más o menus rosas i las anteras amarillinas. Train menus alas abejas, peru se las puei vél froreandu en arvu en arvu andiquiera.

Huenti la praçuela de San José
Mañana, alas 10:00 sal de La Praça la ruta cicloturística 'Valdelacalzada en flor', ala que ai que estal escritu i el domingu sal de L'Acampá una ruta a peoncia de 15 km. Tamién en essi día se celebrará velallí ala mugel trebajaora.