domingo, septiembre 16, 2012

Los Concejiles

Los que vivimus an pie de Guadiana no conocemus más que frutalis, maizalis o tomatalis en una tierra que ya está desgastá pol cultivu intensivu, sin colol propiu. Quantis que salimus dela caxa de Guadiana i mos empingorotamus enos cerrus que se vein alo largu, pa Lobón, pa Montiju, pa Guadiana descubrimus otrus coloris que traçan las lindis delo colorau. 

Es pa Lobón ondi prencipia la Tierra-de-Barrus. Namás ai que subil pa qualquiera delos sus cerrus pa comprendel que la tierra no es la mesma que apenas meia legua más abaxu. Con un amarrón más huerti, colorau alas vezis, comu barruntandu la grea delos cacharrus. I pensal que estu ai millonis d'añus era una praya...

Cortiju farrungau entreVal-de-Romero i el camino de Cansaburras
Atravessandu polos maizis dela vega Las Monjas (ya vos trairé retratus d'ella tamién) cogemus el caminu vieju que diva a Almendraleju dendi Lobón. Esti caminu no está hechu pista, de má que dil con el cochi no trai cuentu comu no seas gustosu de rompel el chasi. Passandu los regueríus, entre cerrus está Val-de-Romero unu de tantus vallis que están rastrillaus en Lobón. Es un valli ferti, de tierra colorá, con cortijus en ca morra, enllenu de vegetación de ribera i algún ucalitu puestu a desora. 

Charca cerca de Val-d'Ovejas
Parti de charcas junta Val-de-Romero
 Tien una tupa de charcas pondi corrin los regatinus más chicus entre Val-de-Romero i Val-d'Ovejas. Muchas d'estas charcas se montonan ena hondaliza que has de portilla pondi vá el caminu i ondi ajuntan varius regatus que ajorran pa essi mesmu sitiu.
 Entre parralis i olivaris va subiendu el caminu, queandu patrás Lobón i entre restus de vaus de iviernu i terrenus endulaus ahilamus pal sul.
Camino Almendralejo
 La tierra alas vezis colorá, otras amarrón, otras mesturá enseña que esta parti cercana a Guadiana ná tien que vel con abaxu la vega. Tola parti que quea ala derecha es lo que llaman los lobonerus Los Concejiles, tierras d'olival que se destiendin entre El Trampín i el Olival Grande. Polo que asseñala el nombri, uvu de sel tierra del Conceju de Lobón duranti sigrus. El topónimu no es corrienti pa estas tierras, peru quea ena memoria dela toponimia l'almenistración comunal de tierras. No es una tierra propia pa uertus, pos las corrientis d'agua están por baxu (El Trampín, Val-de-Romero, Val-d'Ovejas), de má que son tierras de secanu: parras i olivus. Algún baldíu se vei, pa Val-d'Ovejas, lo que mos asseñala que parti d'estas tierras estavan pa pastu.
Los Concejiles
Charca junta'l camino'l Olival Grande
 Queandu el cortiju de Gallardo ala derecha, cogemus el camino'l Olival Grande. Esti caminu, más anchu i mejol dispuestu, tien una charquina junta un cañal al lau. Otra ves vemus comu las charcas junta los caminus mos da má señas pa creel que esti era  tamién transitau pol ganau, comu vimus en un anteriol endilgu sobre'l cordel de Barbaño. La calol dela tardi me quitó de preguntal a naidi cómu llaman a essa charca o alas que están más abaxu, junta Val-de-Romero. Las únicas pressonas que vidi estavan cosechandu maís muchu más abaxu, pala vega Las Monjas.

 Un poquinu más alantri cogemus otra ves el camino Almendraleju que sal del norti de Lobón i que ogañu mos lleva al polígonu. De frenti vemus Lobón soberbiu, guardandu tolos puebrus de Las Vegas Baxas.
Camino'l Caracol. Al hondón, Lobón
 Enantis de afrontal-mus la autovía, mos desviamus pa ponienti pa cogel el camino'l Caracol. Lo llaman assín no por hazel competicionis con caracolis ajorrandu pallí, sino por tenel muchas retortuñas, comu las conchas d'ellus. Es un caminu hechu pista, bien aviau, que ajorra pol valli que hazi El Trampín.
El Trampín
Una delas revueltas la tienin adecentás, con estaonchus, bancus i letreru informativu que mos comenta qué es lo que se vei dendi allí arriba. La imagin es preciosa, porque las vegas están al atrás dela portilla d'El Trampín i abaxinu poemus vel la bondá d'esti mansu regatu. En una tierra greosa ain puestus olivus, higueras i parras. Enas costanas delos cerrus se vein chumberas i almendrus i ena ribera d'El Trampín matorragi i cañais. Uvu de sel tiempu atrás sitiu de uertus, pos agua no le falta. En estandu en una hondonera, estrecha vega d'El Trampín, mu cerquina del puebru, no es ralu pensal que s'aprovechara comu terrenu pa uertus, lo mesmu que'l hondigañu ondi está el conventu. Amás no faltan huentis: pallí anda La Bonilla i otras que derrotarun pa hazel la autovía i la carretera nacional. No en baldi lleva esti nombri d'El Trampín: es unu delos topónimus que mejol atestigan el estremeñu en esta parti, pos está hechu cona raís de tramp| que vemus en otru topónimu mu corrienti en Estremaúra, El Trampal. El sufixu -ín, d'origin latinu i mu gastau en el ponienti peninsulal da norti dela nuestra lengua mejol que otru nengunu. La abondancia de huentis, los regatuelus i regatus que van a paral dendi Las Senaras, El Lexío o El Montezillo tuvun que dal a esta hondoná un jeitu de trampalinu i bamburral.
Regatu d'El Trampín
De tolos puebrus que costitúin Las Vegas Baxas, Lobón es el que mejol á sabíu conserval los cultivus propius d'esta tierra: frutalis, almendrus, higueras, olivus, parras i pequeñus uertus pa casa s'án resestíu ena parti norti del puebru a cedel al regueríu massivu que enseca la tierra i la pon cuéscara, sustrayendu-li los mineralis i el'agua. Namás la vega Las Monjas i la parti de Pedro Franco las gastan, dientru del Plan Badajoz, comu destensus maizalis o graveras cancerosas. Por essu, pa comprendel mejol Las Vegas Baxas ai que salil-si un pocu de d'ellas i vel cómu era la vida enantis delos regueríus i entedel lo bien que lo hizun los viejus estremeñus que en baxu delas goviernas de Roma, delos morus o delos cristianus viejus supun ambiental-si enantis que ambiental.

No hay comentarios: