jueves, abril 30, 2009

Luenga fija: Caé de la burra

Son muchas las frasis hechas enas qu'el burru u la burra es el referenti. Lejotis de sel frasis que resurtin vurgaris u rústicas, los símis que se logran están mu bien traius a cuentu. Una de las frasis que mas me petan ena qu’el burru es el protagonista es velaquí caé u caese de la burra (caelsi de la burra). Se gasta la frasi pa endical qu'alguin, de chopetón, se toma cuenta de lo que has u á hechu i, arreparandu nellu, ponga los piezis nel suelu tras queal escaldau. Veleí, la frasi la gasta alguin en cuya opinión lo hechu pol Beltranitu no es corretu. Tien mucha relación con otra frasi apaicia, abajase de la burra, que notru apartiju trataré.
—Fulanito ara s’á casao con Menganita, una güena desbalagaora, tol dia a comprase baberos i alpargates.
—Éjalo, ya cairá de la burra de que lo despele.

lunes, abril 20, 2009

Luenga fija: Pegase un pegote

Eníciu una nueva seición pa dali un poquinu movimientu a la bitácora, que dende hazi unus añus está paraina. No es pol halta material, que tengu muchu, sino polo pocu olganizau que lo tengu entavia. Con Luenga fija quiu hazel un recorriu pol mundu las espressionis, frasis, locucionis, dichus, reflanis, acertajonis que se dan nel estremeñu las Vegas Bajas i nel qu'asperu que contribuiga mas genti.

Emprencípiu el apartiju esti con una frasi corrienti i coloquial: pegalsi un pegoti (prenunciau aquina comu pegase un pegote). Se trata duna frasi compuesta pun proverbu + ojetu. El verbu pegal que tien escasinu valol semánticu está apellau a un ojetu de la mesma raís peg-. Aquina se gasta con sintiu reflessivu pol atiju la aición verbal con el sujetu: pega-se. El ojetu pegoti has referéncia al hechu u dichu desatinau. La frasi pegase un pegote senifica “conhundilsi queandu en velgüença” i que puei equivalel al castellanu coloquial decir una parida. V. gr.:
—Estuve el año passao en Las Encantás de Agosto en Montijo.
—En Agosto? Aí t’ás pegao un güen pegote, chacha, quando son en Júnio!

domingo, abril 19, 2009

Vídiu Valdelacarçá en frol/Vídeo de Valdelacalzada en flor

Esti es un vídiu que hizi esti añu conos mijoris afotus que tengu hechus a las parcelas del muestru puebru. Asperu que vos gusti.